Дамашқда фонд биржаси қайта очилди

Сурия пойтахти Дамашқда фонд биржасини қайта очди. Бу ҳақда Сурия ахборот агентлиги хабар берди.

Очилиш маросимида Суриянинг янги маъмурияти иқтисодиёт ва саноат вазири Нидал Шаар, алоқа ва ахборот технологиялари вазири Абдуссалом Хайкал, молия вазири Муҳаммад Юср Бернийе, Марказий банк губернатори Абделқодир Ҳасрие ва бир қанча компаниялар вакиллари иштирок этди. Очилишда сўзга чиққан молия вазири Бернийе биржанинг қайта очилиши мамлакатда иқтисодий тикланиш бошланганидан далолат эканини айтди.

Унинг қайд этишича, Дамашқ фонд биржаси хусусий компания сифатида фаолият юритади, ҳақиқий иқтисодий марказга айланади ва рақамли трансформацияга мослашади. Берниенинг таъкидлашича, уларнинг иқтисодий қарашлари адолат, тенглик, хусусий сектор етакчилиги ва сармояни жалб қилишга асосланган.

“Биз бизнес муҳитини соддалаштириш устида ишлаймиз. Бизда истиқболли сармоявий истиқболлар бор”, деди у.

Шунингдек, у биржа хусусий сектор учун рақобатчи бўлиб қолмаслигини, аксинча, бирлаштирувчи ва қўллаб-қувватловчи роль ўйнашини қўшимча қилди. Вазирнинг таъкидлашича, жорий очилиш фақат синов босқичи бўлиб, тўлиқ ишга тушириш фонд бозори, инвестициялар ва компаниялар фаолиятини тартибга солувчи тегишли қонунлар қабул қилингандан кейин амалга оширилади. Маросим якунида Бернийе ва бошқа расмийлар биргаликда очилиш қўнғироғини уриб, рамзий маънода очилишни нишонладилар.

Эслатиб ўтамиз, жорий йилнинг 13 май куни АҚШ Президенти Дональд Трамп Сурияга қўйилган санкцияларни олиб ташлаш ва “унга иккинчи имконият бериш”га ваъда берганди. Унинг айтишича, бу чекловлар “қатъий ва фалокат даражасида” бўлган, аммо ўз вазифасини бажарган.

Кейинроқ эса Дональд Трамп Саудия Арабистонига ташрифи давомида Сурия муваққат президенти Аҳмад аш-Шара билан шахсан учрашди. Учрашувда Трамп яна бир бор АҚШнинг Сурия бўйича санкцияларни бекор қилишини эълон қилган. Ўтган ой охирида Европа Иттифоқи кенгаши ҳам Сурияга нисбатан қўлланилган барча иқтисодий чеклов чораларини (фақат хавфсизлик билан боғлиқ санкциялар бундан мустасно) бекор қилиш тўғрисида юридик ҳужжатларни қабул қилди.