COVID-19’нинг янги штамми Ўзбекистонга ҳам кириб келадими?

Ўзбекистонда эпидемиологик вазият барқарорлиги сабаб COVID-19’нинг “Цикада” деб номланган янги – BA.3.2 штамми тарқалиш эҳтимоли паст. Бу ҳақда Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков маълум қилди.

Қайд этилишича, Жаҳон соғлиқни сақлаш ташкилоти томонидан ҳозиргача АҚШ, Гонконг, Мозамбик ва Буюк Британия каби 23 та давлатда ушбу мутация рўйхатга олинган.

Отабековнинг айтишича, аслида, BA.3.2 штамми аниқланганига анча бўлган ва у бир хил тезликда тарқалмаслиги билан характерланади. Шу боис бу мутацияга 17 йилгача “уйқуга кетиши” мумкин бўлган ва узоқ муддат борлигини сездирмайдиган ҳашарот – цикада номи берилган.

Дастлабки ўрганишларга кўра, “Цикада” штамми “Омикрон”га хос, ўхшаш клиник белгилар билан кечади. У нафас йўллари жароҳатланиши, яъни бурун битиши, йўтал, томоқда оғриқ, қизариш, баъзан ҳид ва таъм билмаслик каби аломатлар билан намоён бўлиши мумкин.

Мутахассислар ушбу касалликка катталарга нисбатан болалар кўпроқ чалинаётганини айтмоқда.

“Маълумки, пандемия даврида дунё аҳолисининг катта қисми COVID-19 га қарши эмланди ва шу туфайли уларнинг қайтадан бу касалликка чалиниш эҳтимоли жуда кам. Аммо аввал коронавирус билан рўбарў келмаган, яъни организмида ҳали хасталикка қарши антитаначалар шаклланмаган болаларнинг бу вирусни юқтириш хавфи мавжуд”, дейди Отабеков.

Унинг қўшимча қилишича, сурункали касаллиги бор, нафас йўллари хасталикларидан азият чекувчилар, иммунитети заиф ва ёши катта инсонлар ҳам бу хавфдан етарли даражада ҳимояланмаган.

“Ўзбекистон мисолида айтадиган бўлсак, мамлакатимизда эпидемиологик вазият барқарор. Аҳолида коронавирус штаммига нисбатан оддий респиратор касалликларга бўлгани сингари муносабат аллақачон шаклланган. Негаки, юртдошларимизнинг қарийб 80 фоизида жамоавий иммунитет вужудга келган. Шу маънода, дунёда қайд этилаётган янги штаммлар ҳақида шов-шувли хабарлар тарқатиш тўғри эмас. Хавотирланиш учун ҳеч қандай асос йўқ”, дейди Отабеков.