Олимпиада олдидан Австралия делегациясида коронавирус аниқланди

2026 йилги Олимпия ўйинлари олдидан Австралия терма жамоасида коронавируснинг икки ҳолати аниқланган. Бу ҳақда ABC News хабар берди.

Маълумотларга кўра, касалланган шахслар спортчи эмас ва улар билан яқин алоқада бўлган делегация аъзолари вирусни юқтирмаган. Делегациянинг икки аъзоси жорий йилнинг 28 ва 31 январь кунлари COVID-19’га чалинган. Касалланганларда ўткир респиратор вирусли инфекция аломатлари кузатилган ва улар вирусга қарши дориларни қабул қилмоқда. Делегация раҳбари Элис Кемплнинг айтишича, жамоада бундай ҳолатлар учун тиббий протоколлар мавжуд.

Маълумот учун, 2026 йилги қишки Олимпияда ўйинлари жорий йилнинг 6-22 февраль кунлари Италиянинг Милан ва Кортина д’Ампеззо шаҳарларида бўлиб ўтади. Австралия жамоаси тарихидаги иккинчи энг катта делегация билан мусобақада иштирок этади. Бу сўнгги 12 йил ичидаги Австралия энг катта таркиб ҳисобланади.

Эслатиб ўтамиз, аввалроқ Ўзбекистон делегацияси Милан-Кортина – 2026 қишки Олимпия ўйинлари учун 4 та йўлланма қўлга киритганлиги ҳақида хабар берилган эди.