Чинозда уйида қиморхона ташкил этган шахс ушланди

Тошкент вилоятининг Чиноз туманида ўз уйида қимор ўйинларини ташкил қилган шахс қўлга олинди. Бу ҳақда Давлат хавфсизлик хизмати хабар берди.

Қайд этилишича, Чиноз туманида истиқомат қилувчи, 1967 йилда туғилган шахс ўзининг яшаш хонадонида 10 нафар фуқаро иштирокида қимор ўйинларини ташкил этгани аниқланган. Тезкор-қидирув тадбирлари натижасида қимор ўйинига тикиб ўйналаётган жами 140 млн сўм миқдоридаги пуллар ашёвий далил сифатида расмийлаштириб олинган.

Билдирилишича, ҳозирда қиморхона ташкилотчисига нисбатан Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилиб, қолган шахсларга нисбатан Маъмурий жавобгарлик тўғрисидаги кодекснинг 191-моддасига (қимор ва таваккалчиликка асосланган бошқа ўйинлар) мувофиқ чора кўрилган.

Эслатиб ўтамиз, аввалроқ Ўзбекистонда букмекерлик хизматларини тарғиб қилувчи 70 га яқин веб-сайт блоклангани ҳақида хабар берилган эди.