Бухорода 2 яшар боланинг томоғидан иккита танга топилди

Бухоро вилоятининг Қоракўл туман тиббиёт бирлашмасида 2023 йилда туғилган боланинг томоқ қисмидан 2 дона танга олиб ташланди. Бу ҳақда вилоят Соғлиқни сақлаш бошқармаси хабар берди. 

Маълум қилинишича, 2 ёшли чақалоқ юқори қизилўнгач тораймасида ёт жисм қолиб кетгани сабабли шошилинч қабулхона бўлимига олиб келинган. Бу ҳолат эътиборсизлик оқибатида юзага келган.

Шундан сўнг, навбатчиликда бўлган юқори малакали шифокорлар жамоаси тезкор тиббий ёрдам кўрсатган. Замонавий тиббий ускуналар ёрдамида юқори технологик, кам инвазив жарроҳлик амалиёти муваффақиятли амалга оширилган ва болакай ҳаёти сақлаб қолинган.

“Айни пайтда беморнинг аҳволи барқарор, шифокорлар назорати остида қониқарли ҳолатда”, дейилади хабарда. 

Эслатиб ўтамиз, аввалроқ фарғоналик 2 ёшли қизнинг қорнидан 135 та магнит шарча олинган эди. Қизалоқ магнит шарчалар билан ўйнаб келган ва шу жараёнда улардан анча-мунчасини ичига ютган. Вақт ўтиши билан шарчалар қорнида йиғилиб қолган ва унинг ҳаётига жиддий хавф солган. Шифокорлар жарроҳлик амалиёти ўтказиб, қизалоқ қорнидаги 135 та магнит шарчани олиб ташлаган.