Бугун Ўзбекистон Мисрга қарши баҳс олиб боради

Бугун, 14 ноябрь куни Ўзбекистон миллий терма жамоаси БААнинг Ал-Айн шаҳрида бўлаётган халқаро ўртоқлик турнири доирасидаги Мисрга қарши баҳс олиб боради. Учрашув “Ҳазза бин Зайд” стадионида Тошкент вақти билан соат 21:00 да старт олади.

Турнирда 2026 йилги Жаҳон чемпионати йўлланмасини қўлга киритган тўртта жамоа – Эрон, Кабо-Верде, Ўзбекистон ва Миср иштирок этмоқда.

Кеча, 13 ноябрь куни бўлиб ўтган биринчи ярим финалда Эрон Кабо-Вердени пенальтилар сериясида мағлуб этиб, финалга йўл олди. Ўзбекистон – Миср ўйинининг ғолиби финалда Эронга қарши майдонга тушади. Мағлуб жамоа эса 3-ўрин учун Кабо-Верде билан баҳс юритади.

Маълумот учун, ушбу ўйин Фабио Каннаваронинг Ўзбекистон миллий терма жамоаси бошқарувидаги учинчи учрашуви бўлади. Бунгача италиялик мутахассис жамоа билан 1 ғалаба ва 1 мағлубият қайд этган.

Эслатиб ўтамиз, аввалроқ Ўзбекистон миллий терма жамоаси бош мураббийи Фабио Каннаваро ноябрь ойидаги йиғинга жалб этилган футболчилар рўйхатини эълон қилган эди.