Бугун Трамп Нетаньяху билан учрашади

Яқин Шарқда кескинлик тобора кучайиб бораётган бир пайтда, АҚШ Президенти Дональд Трамп бугун, 11 февраль куни Оқ уйда Исроил Бош вазири Беняьмин Нетаньяхуни қабул қилади. Бу ҳақда BBС хабар қилди.

Учрашув Эроннинг ядровий дастури бўйича музокаралар ҳал қилувчи босқичга кирган вақтда бўлиб ўтмоқда.

Нетаньяху АҚШга жўнаб кетишидан олдин журналистларга берган интервьюсида, кутилаётган музокараларда Трампни Эроннинг уранни бойитишни тўхтатиш, ҲАМАС ва “Ҳизбуллоҳ” каби гуруҳларни қўллаб-қувватлашни чеклаш бўйича келишувга эришишга ундашини маълум қилган.

Эрон эса Ғарб санкциялари юмшатилмагунча уранни бойитишни чекламаслигини билдирган. Теҳрон аввал иқтисодий босимлар бекор қилиниши кераклигини талаб қилмоқда.

Нетаньяхунинг бу ташрифи Трамп президентликка қайтганидан буён АҚШга олтинчи сафари ҳисобланади. У Оқ уйга бошқа хорижий етакчиларга қараганда кўпроқ ташриф буюрган.

Қайд этиш жоизки, айни вақтда АҚШ Яқин Шарқдаги ҳарбий иштирокини кучайтирмоқда. Трамп Эрон ядровий келишувга эришмаса, қўшимча чоралар кўрилиши мумкинлиги ҳақида огоҳлантирган. У минтақага иккинчи авиаташувчи зарба берувчи гуруҳ юбориш масаласини кўриб чиқаётганини маълум қилган. Аввалроқ, USS Abraham Lincoln авиаташувчи кемаси минтақага жўнатилган эди.

Исроил расмийлари ҳам агар Эрон АҚШ билан келишувга эришмаса, ҳарбий чоралар кўриш ҳуқуқи сақланиб қолишини билдирган.

Таҳлилчиларга кўра, Нетаньяху Трамп билан яқин алоқаларидан фойдаланиб, Исроил хавфсизлик манфаатларига мос келадиган кенг қамровли келишувга эришишга интилмоқда.

Жоржтаун университети профессори Дэн Байманнинг фикрича, Исроил АҚШ Эрон билан шошилинч келишувга эришиб, ракета дастури ёки ҲАМАС ва “Ҳизбуллоҳ”каби гуруҳларни қўллаб-қувватлаш масалаларини четда қолдириши мумкинлигидан хавотирда.

Учрашув натижалари Яқин Шарқдаги хавфсизлик ва Эрон ядровий дастури бўйича келгусидаги дипломатик жараёнларга сезиларли таъсир кўрсатиши кутилмоқда.

Эслатиб ўтамиз, аввалроқ Эрон Президенти Масъуд Пезешкиён АҚШ, Исроил ва Европа етакчиларини мамлакатдаги иқтисодий муаммолардан фойдаланиб, норозилик намойишларини қўзғатишда айблаганди. Унинг сўзларига кўра, ташқи кучлар Эрон жамиятини парчалаш мақсадида намойишчиларга турли воситалар тақдим этган.

Жамшидбек Амиров