Бугун Роналду майдонга тушади – Романо

Саудия Арабистони “Ал-Наср” жамоаси ҳужумчиси Криштиану Роналду жамоа билан бирга бугун, 14 февраль куни Саудия Арабистони Про-лигасининг 22-тури доирасида “Ал-Фатеҳ”га қарши бўлиб ўтадиган ўйинга йўл олди. Бу ҳақда инсайдер Фабрицио Романо маълум қилди.

Португалиялик ҳужумчи аввалроқ “Ал-Наср”нинг кетма-кет учта учрашувида (шундан иккитаси Про-лигада, биттаси эса Осиё Чемпионлар Лигасида) майдонга тушмаганди.

Маълумотларга кўра, Роналду Саудия Арабистони Инвестиция жамғармасининг (PIF) мамлакатдаги бир нечта клубларга нисбатан юритаётган сиёсатига норозилик сифатида “Ал-Наср” сафида ўйнамаган. Шунингдек, у жамоанинг айрим ходимлари маошларининг кечиктирилганидан норози эканини ҳам шу йўл билан билдирган.

Маълумот учун, Криштиану Роналду жаҳон футболи тарихида энг кўп гол урган футболчи бўлиб, ҳисобида 961 та гол бор. Португалиялик юлдуз 2023 йилдан буён “Ал-Наср” сафида тўп суриб, 127 та ўйинда 111 та гол муаллифига айланган.

Эслатиб ўтамиз, аввалроқ “Ал-Наср” жамоаси мухлислари Саудия Арабистони Премьер-лигасининг 21-туридан ўрин олган “Ал-Иттиҳод”га қарши учрашув вақтида португалиялик ҳужумчи Криштиану Роналдуни қўллаб-қувватлаш мақсадида махсус акция ўтказганди.