Бугун бирорта муаммо қолмаслиги керак – Президент инвесторлари билан мулоқотда

Инвестор билан давлат орасидаги Ўзбекистондаги тизим янги поғонага чиқиши керак. Бу ҳақда бугун, 16 октябрь куни Президент Шавкат Мирзиёев ёқилғи-энергетика соҳасидаги инвесторлар билан ўтказилаётган очиқ мулоқотда сўз очди.

“Мен бугун сизларни кўпроқ мулоқотга таклиф қиламан. Бир нарсани билишларинг керакки, инвестор билан давлат орасидаги Ўзбекистондаги тизим янги поғонага чиқиши керак”, дейди Шавкат Мирзиёев.

Шунингдек, Ўзбекистон етакчиси замон шиддат билан ўзгараётганини қайд этган.

“Албатта, замон шиддат билан ўзгараяпти. Биз янги-янги талабларга бутун командамиз билан мос бўлиш учун бугун сизларни кўпроқ эшитмоқчиман.

Биронта муаммо бугун қолмаслиги керак. Ҳамма масалани ҳал қилишимиз керак. Ютуғимиз бор, лекин камчилигимиз ҳам жуда кўп. Шунинг учун энди хато қилишга ҳаққимиз йўқ.

Биз бир-биримиз билан дўст бўлишимиз учун ҳамма нарса очиқ бўлиши керак, аён бўлиши керак, шаффоф бўлиши керак.

Келгуси йилга бу йил замин яратишимиз керак”, дейди Ўзбекистон Президенти.