Бу сохталаштирилган турнир – Мустафо Зико

Миср миллий терма жамоаси ҳужумчиси Мустафо Зико Жаҳон чемпионатининг 1/8 финал босқичидаги Аргентинага қарши ўйиндаги ҳакамликдан норози эканини билдирди. Бу ҳақда у ўйиндан сўнг журналистларга берган интервьюсида сўз очди.

Кеча, 7 июль куни Миср терма жамоаси Аргентинага 2:3 ҳисобида мағлуб бўлди. Учрашувни франциялик ҳакам Франсуа Летексье бошқариб борди.

“Менинг назаримда, ҳакам биринчи дақиқаданоқ ўйин тақдири қандай бўлишини ҳал қилиб қўйганди. Биз Миср халқига қувонч улашишни истагандик, аммо бунинг имкони бўлмади”, дейди Зико.

Футболчи, шунингдек, мусобақадаги ҳакамликка кескин баҳо берди.

“Аргентина терма жамоасини Жаҳон чемпионатидаги ғалаба билан табриклайман. Менимча, бу сохталаштирилган турнир. Улар қолган ўйинларни ўтказмаса ҳам бўлади. Ҳакам бутун бир миллатнинг орзусини барбод қилди. Менинг фикримча, у бизга нисбатан бир томонлама муносабатда бўлди, чунки бизнинг ғалаба қозонишимизга йўл қўйилмаслиги керак эди”, дейди у.

Маълумот учун, 2026 йилги Жаҳон чемпионати АҚШ, Канада ва Мексикада бўлиб ўтмоқда. Турнир жорий йилнинг 19 июль куни якунланади.