Бруно Фернандеш МЮни тарк этмоқчи – ОАВ  

“Манчестер Юнайтед” жамоаси ярим ҳимоячиси ва сардори Бруно Фернандеш клубдаги “нотинчлик”дан чарчагани ва келаси ёзда жамоани тарк этишга тайёр эканини маълум қилган. Бу ҳақда “The Sun” нашри хабар берди.

Манбага кўра, португалиялик футболчининг жамоадошлари унинг бундай қарорини тушунишмоқда. Уларнинг айтишича, Фернандеш 2020 йилда “қизил иблислар” сафига қўшилганидан бери ҳар доим бор кучини ишга солган ва жамоанинг энг барқарор ҳамда етакчи ўйинчиларидан бири бўлиб келган.

Шу билан бирга, ярим ҳимоячи “Манчестер Юнайтед”нинг янги эгалик модели томонидан ўзига нисбатан ишонч сусайганини ҳис қилмоқда. Қолаверса, бош мураббий Рубен Аморимнинг ишдан бўшатилиши ҳам унинг “Олд Траффорд”да фаолиятини давом эттириш истагини кучайтирмаган.

Маълумот учун, Бруно Фернандеш “Манчестер Юнайтед” сафида барча мусобақаларда жами 309 та ўйинда майдонга тушиб, 103 та гол урган ва 94 та голли узатмани амалга оширган. Унинг клуб билан амалдаги шартномаси 2027 йил ёзига қадар мўлжалланган. “Transfermarkt” маълумотларига кўра, футболчининг бозор қиймати 40 миллион еврони ташкил этади.

Эслатиб ўтамиз, аввалроқ Саудия Арабистонининг “Ал-Ҳилол” клуби жорий трансфер ойнаси давомида “Манчестер Юнайтед” ярим ҳимоячиси ва сардори Бруно Фернандеш билан шартнома имзолаш борасидаги тайёргарлик ишларини қайта бошлаган эди.