Британияда учувчи парвоз вақтида ҳушини йўқотди

“Jet2” авиакомпаниясига қарашли “Airbus A321” самолётининг учувчиларидан бири Британия устида парвоз вақтида ҳушини йўқотди. Шу сабабли экипаж фавқулодда вазият эълон қилишга мажбур бўлган. Бу ҳақда “Mirror” нашри хабар берди.

Маълумотларга кўра, жорий йилнинг 3 февраль куни Ланзароте оролидан учиб чиққан “LS980” рейси Манчестер аэропортига режалаштирилган қўнишидан тахминан 25 дақиқа олдин Буюк Британия йўналишида одатий тартибда парвоз қилаётган бўлган.

“Самолёт Манчестерга яқинлашганда экипаж Squawk 7700 фавқулодда вазиятни билдирувчи халқаро кодни узатган ва диспетчерлик хизматига учувчилардан бири соғлиғида юзага келган кутилмаган муаммо сабабли ўз вазифаларини давом эттира олмаслигини маълум қилган”, дейилади хабарда.

Учувчи кабинасида имкониятлар чекланган бўлишига қарамай қолган учувчи самолётни тўлиқ назорат остида ушлаб турган ва қўнишни хавфсиз тарзда давом эттирган.

Натижада самолёт муваффақиятли қўнган, воқеа жойида тиббий бригадалар ҳушини йўқотган учувчини кутиб олган. Йўловчилар одатдаги тартибда самолётдан туширилган, экипаж ва йўловчилар орасида жабрланганлар бўлмаган.

“Jet2” авиакомпанияси учувчининг аҳволи бўйича батафсил маълумот бермаган.

Эслатиб ўтамиз, аввалроқ Мексикада маош олмаган учувчи йўловчилар тўла самолётда норозилик намойиши уюштирган эди.