Бразилиянинг қамалган президенти вақтинчалик озодликка чиқарилди

Бразилия Олий суди собиқ президент Жаир Болсонаруга жарроҳлик амалиёти ўтказиш учун вақтинча қамоқхонани тарк этишга рухсат берди. Бу ҳақда “Reuters” хабар берди.

Нашр хабарига кўра, суд кеча, 20 декабрь куни Болсонарунинг адвокатлари берган илтимосномани қисман қаноатлантирган. Улар уни шифохонага олиб чиқишга рухсат сўраган. Шу билан бирга, соғлиғи сабаб уй қамоғига ўтказиш ҳақидаги талаб рад этилган.

Ҳозирда 27 йилга озодликдан маҳрум этилган Болсонару чуррани олиб ташлаш бўйича операциядан сўнг яна қамоқхонага қайтарилади.

70 ёшли Болсонару соғлиқ билан боғлиқ сурункали муаммоларга эга. Жумладан, 2018 йилги сайловолди кампанияси пайтида қорин қисмига пичоқ билан етказилган жароҳат оқибатида у бир неча бор операция қилинган. Шунингдек, сентябрь ойида унда онкологик касаллик аниқлангани ва эрта босқичда топилгани сабаб икки ёмон сифатли ўсма олиб ташлангани хабар қилинган.

Эслатиб ўтамиз, Бразилия Олий суди Жаир Болсонаруни ҳарбийлар иштирокидаги фитнани ташкил этишда айбдор деб топган. У 2023 йил январида Лула да Силванинг ҳокимиятга келишига тўсқинлик қилишга уриниш иши бўйича айбланмоқда. Болсонару эса ўз айбини тан олмай, буни сиёсий таъқиб деб атамоқда.

12 сентябрь куни у давлат тўнтаришига уриниш учун 27 йил 3 ойга қамоқ жазосига ҳукм қилинган. Ушбу иш бўйича яна етти нафар унинг яқин сафдошлари, жумладан, юқори лавозимли вазирлар ва амалдорлар ҳам айбдор деб топилган.