Бош вазир 30 йиллик хотини билан ажрашди (видео)

Арманистон Бош вазири Никол Пашинян билан фуқаролик никоҳи, яъни расман турмуш қурмай яшаб келаётган Анна Акопян у билан ажрашганини эълон қилди. Бу ҳақда у ўзининг ижтимоий тармоқлардаги саҳифасида видеобаёнот билан чиқди. 

Унинг тушунтиришича, Пашинян билан фуқаролик никоҳи якунлангани ҳақидаги қайд уларнинг ФҲДЁда рўйхатдан ўтишини эмас, айнан биргаликдаги ҳаёти тугаганини англатади. 

Шунингдек, у ҳукумат қароргоҳини тарк этиб, ижарага олинган хонадонга кўчиб ўтаётганини маълум қилган. 

“Барча дўстларим, таниш-билишларим ва нотанишларга, яқинларим ва ҳатто энг яқин инсонларимга айтаманки, бу мавзу муҳокама қилинмайди. Мен буни тақиқлайман. Сизни ҳам, азиз халқим, бу масалани муҳокама қилишга кўп вақт сарфламасликка чақираман. Бу бефойда машғулот бўлади. Эшитдингиз, қайд этдингиз ва йўлингизда давом этинг”, дейди у. 

Никол Пашинян ҳам ижтимоий тармоқда пост ёзиб, Анна Акопяндан кечирим сўради. 

“Аннанинг қарорини ҳурмат қиламан. У сўнгги 30 йил давомида, энг қийин кунларимда ёнимда бўлди, менга суянчиқ ва таянч бўлди. Мен ҳам у учун шундай бўла олдимми, йўқми – ишончим комил эмас.  Мен унга кўпроқ қайғу келтирган бўлсам керак, бунинг учун кечирим сўрайман”, дейди Бош вазир.

Никол Пашинян ва Анна Акопян қарийб 30 йил давомида расмий никоҳдан ўтмасдан (фуқаролик никоҳида) бирга яшаб келган.Пашиняннинг таъкидлашича, 1990-йилларда у мухолифатчи сифатида таъқиб қилиниши ва мол-мулки мусодара этилиши мумкин бўлгани учун оиласини ҳимоя қилиш мақсадида расмий никоҳдан қочган. Жуфтликнинг тўрт нафар фарзанди — уч қиз ва бир ўғли бор:

•    Мариам (1998 йилда туғилган) — тўнғич қизи, жамоатчиликка энг таниш фарзанди.
•    Ашот (2000 йилда туғилган) — ягона ўғли. У (тан олинмаган) Тоғли Қорабоғда ҳарбий хизматни ўтаган.
•    Шушан (2007 йилда туғилган).
•    Арпи (2015 йилда туғилган) — оиланинг энг кичик фарзанди.