Бош прокуратура фуқароларни фирибгарлардан огоҳлантирди

north_east

ДХА премиум-класс автомашинали “доставшик”ларга “аччиқ” мурожаат йўллади

Бош прокуратура ҳузуридаги Иқтисодий жиноятларга қарши курашиш департаменти COVID-19 билан боғлиқ безовталикдан фойдаланилаётган фирибгарлар тўғрисида огоҳлантирди.

Жиноий даромадларни легаллаштиришга қарши курашишда молиявий чоралар ишлаб чиқувчи гуруҳ (ФАТФ) ва Interpol COVID-19 пандемияси туфайли юз (жарроҳлик) ниқоблари ва бошқа тиббий буюмларга талаб ошганлигидан фойдаланиб, уларнинг савдоси тўғрисида ёлғон маълумот бериш орқали фирибгарлик жиноятлари содир этиш эҳтимоли ошганлиги тўғрисида хабар берган.

Хабарда, ҳозирги соғлиқни сақлаш соҳасидаги инқироз даврида жамоатчилик дори-дармонларни онлайн тарзда сотиб олишда эҳтиёт бўлишлари, акс ҳолда, улар жиноятчиларнинг бир қатор молиявий фирибгарликларни амалга ошириш учун имкон яратишлари мумкинлиги таъкидланган.

Фирибгарлар жиноий ниятларини амалга ошириш мақсадида тиббиёт маҳсулотларини сотишни даъво қилган ҳолда сохта онлайн-дўконлар, веб-сайтлар, ижтимоий тармоқлардаги аккаунтлар ва электрон почта манзилларидан фойдаланмоқдалар.

Мазкур фирибгарлик ҳаракатларнинг асосий қурбонлари Осиёда жойлашган бўлиб, жиноятчилар ўзларини ушбу соҳада ишончли экспортёрлар сифатида кўрсатиш мақсадида бошқа минтақаларда, хусусан Европада рўйхатдан ўтган банк ҳисоб рақамларидан фойдаланмоқдалар.

“Ҳурматли фуқаролар шунга кўра Сиз, хориж компанияларидан дори-дармонлар ёки тиббиёт буюмларини онлайн харид қилмоқчи бўлсанганиз, пул маблағларини ўтказишга шошилмасдан, қуйидаги тавсияларга амал қилишингизни сўраймиз:

– онлайн ҳаридларни амалга ошириш хизматини таклиф этаётган компаниялар фаолиятига билдирилган шарҳлар билан танишиш (бошқа мижозлар сотиб олган товарларни олмаганликлари ҳақидаги шикоятлар мавжудми ёки йўқми); 

– компания жойлашган мамлакатда эмас, балки бошқа мамлакатда очилган банк ҳисоб рақамига тўловни амалга оширишни сўраса, харидни амалга оширмаслик; 

– номаълум юборувчидан келган ёки Сиз кутмаган ҳавола ёки иловаларни очмаслик; 

– тиббий асбоб-ускуналарни таклиф қилувчи ёки тиббий кўрикдан ўтказиш учун шахсий маълумотларингизни талаб қиладиган электрон почта хабарларига маълумот тақдим этмаслик.

Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти фирибгарлик қурбони бўлмаслик учун огоҳ бўлишни сўрайди”, дейилади Бош прокуратура мурожаатида.

Эслатиб ўтамиз, Ўзбекистонда коронавирусни юқтириб олиш билан боғлиқ илк ҳолат жорий йилнинг 15 март куни қайд этилган эди. Айни вақтгача 167 кишида коронавирус аниқланди. Ҳозиргача 7 киши касалликдан фориғ бўлди, 2 киши вафот этди.

Қадрли юртдошлар, карантин даврида зарурат бўлмаса, кўчага чиқманг. Вақтни оилангиз, фарзандларингиз даврасида ўтказинг. Унутманг, #UydaHayotBor