Бор эътиборимиз Париж Олимпиадасига қаратилган – Фаррух Қиличев

Бокс бўйича Ўзбекистон терма жамоаси мураббийи Фаррух Қиличев Олимпия ва жаҳон чемпиони Баҳодир Жалоловнинг Париж-2024 Олимпиадасига тайёргарлик жараёнлари қандай кечаётгани ва спортчи формасини босқичма-босқич тиклаб бораётганини айтди.

“Баҳодир ҳозир рингни яхшилаб ҳис қилиб олиши керак, чунки у охирги марта ўтган йили сентябрь ойида ҳаваскор боксда жанг қилганди. Ҳозир унинг яхши формада эмаслиги ҳам Париж Олимпиадасига тайёргарликнинг маълум бир босқичи ҳисобланади. Режага кўра, Баҳодир яна 1-2 та ҳаваскор бокс мусобақаларида иштирок этиши керак. Олимпиадагача у жисмоний ҳолатини тўлиқ яхши кўринишга келтириб олади”, дейди Фаррух Қиличев.

Маълумот учун, катта танаффусдан сўнг Баҳодир Жалолов биринчи марта март ойида Озарбайжоннинг Баку шаҳри мезбонлик қилган “Great Silk Way-2024” турнирида 2 та жанг ўтказиб, ғалаба қозонди ва мусобақа ғолибига айланди.

Эслатиб ўтамиз, аввалроқ Жалоловнинг ўзи ҳам нега яхши жисмоний ҳолатда эмаслигига изоҳ берганди.