Бокс бўйича собиқ жаҳон чемпиони отиб ўлдирилди

Жанубий африкалик боксчи, икки вазн тоифасида собиқ жаҳон чемпиони Золани Тете 38 ёшида Жанубий Африкада отиб ўлдирилди. Бу ҳақда “Daily Mail” нашри хабар берди.

Манбага кўра, фожиа кеча, 21 август куни кечқурун Шарқий Кейп провинциясининг Мдантсане шаҳрида содир бўлган.

Полиция маълумотларига кўра, Тете уйига яқинлашиб, дарвоза очилишини кутаётганида, икки нафар қуролланган шахс унга ҳужум қилган.

Тете ҳовлига киришга уринган, аммо олган жароҳатлари оқибатида воқеа жойида вафот этган. Унинг 27 ёшли шериги эса бир неча ўқ жароҳати билан шифохонага ётқизилган. Ҳужумчилар воқеа жойидан қочиб кетган.

Маълумот учун, Тете фаолияти давомида Жаҳон бокс ташкилоти (WBO)нинг енгил вазн тоифасидаги ҳамда Халқаро бокс федерациясининг (IBF) супер енгил вазн тоифасидаги жаҳон чемпионлик камарларини қўлга киритган.

2017 йил 18 ноябрь куни у ватандоши Сибонисо Гоняни 11 сонияда нокаутга учратиб, жаҳон чемпионлик жангидаги энг тезкор нокаут рекордини ўрнатган.

Тете 2022 йилдан буён расмий жангларда иштирок этмаган. У допингга қарши қоидаларни бузгани учун олган тўрт йиллик дисквалификациясини июль ойида ўтаб бўлган ва шундан сўнг профессионал рингга қайтишни режалаштирган эди.