БМТ штаб-квартирасини Нью-Йоркдан кўчириш таклиф қилинди

Аввалроқ, АҚШ Давлат департаменти Колумбия Президенти Густаво Петронинг визасини бекор қилгани ҳақида хабар берилган эди. Бунинг ортидан Густаво БМТ штаб-квартирасини Нью-Йоркдан кўчиришни таклиф қилди. Бу ҳақда у ўзининг Х’даги саҳифасида ёзди.

“Ассамблеяда қатнашаётган Президентлар тўлиқ иммунитетдан фойдаланади. Фаластин расмийларига кириш рухсат этилмагани ва менинг визам АҚШ ҳамда Исроил армиясини бутун инсониятга қарши жиноят бўлган геноцидни қўллаб-қувватламасликка чақирганим учун бекор қилингани АҚШ ҳукумати халқаро ҳуқуқ меъёрларига амал қилмаётганидан далолат беради. Бирлашган Миллатлар Ташкилотининг штаб-квартираси Нью-Йоркда қолмаслиги керак”, деб ёзди Петро.

Петро, шунингдек, унга виза эмас, балки фақат ESTA (АҚШга қисқа муддатли сафарлар учун онлайн тарзда рухсат олиш тизими) кераклигини, чунки у нафақат Колумбия, балки Европа фуқароси эканини билдирган. 

“Мен ўзимни бу дунёдаги эркин фуқаро деб ҳисоблайман. Инсоният бутун дунёда эркин бўлиши керак. Бизнинг сайёрада яшашга ҳаққимиз бор”, дейди Президент.

Эслатиб ўтамиз, аввалроқ АҚШ Давлат департаменти Петро визасини бекор қилишга унинг гўёки америкалик аскарларни “буйруқларга бўйсунмасликка ва зўравонликка ундашга” чақирган баёнотлари сабаб бўлганини билдирган эди.