Бектемир Мелиқўзиев рақибини нокаутга учратди

Кеча, 6 ноябрь куни ўзбекистонлик профессионал боксчи, WBA супер ўрта вазн тоифасида чемпионлик камари учун мажбурий даъвогар Бектемир Мелиқўзиев Дубай шаҳрида ўтказилган бокс оқшомида тожикистонлик Кароматулло Шариповга қарши жанг қилди. Баҳснинг иккинчи раундида Мелиқўзиев рақибини техник нокаутга учратиб, ғалаба қозонди.

Тўрт раундга мўлжалланган жангда Бектемир Мелиқўзиев муддатидан аввал техник нокаут билан ғалабани қўлга киритди. Бу ўзбекистонлик боксчининг профессионал фаолиятидаги 18-ғалабаси бўлди. Шарипов эса фаолиятидаги тўртинчи мағлубиятини қабул қилиб олди.

Аввалроқ, WBA’нинг амалдаги жаҳон чемпиони, мексикалик Хайме Мунгияга Никита Цзюга қарши ихтиёрий ҳимоя жангида иштирок этишга рухсат берилган эди.

WBA қарорига кўра, мазкур жангдан кейин Мунгия жамоаси мажбурий даъвогар мақомида турган Бектемир Мелиқўзиев билан чемпионлик камари учун беллашув бўйича музокараларни дарҳол бошлаши керак.

Маълумот учун, Бектемир шу кунгача профессионал боксда 18 та жанг ўтказиб, 17 тасида ғалаба қозонган. Шарипов эса 8 та жангда иштирок этиб, 4 та ғалаба, 3 та мағлубият ва 1 та дуранг қайд этган.