Бекатлар қурилиши кечикиши ортидан Тошкент шаҳар ҳокимлиги огоҳлантирилди. Айб тан олинадими?

Тошкент шаҳар ҳокимлиги томонидан бирорта замонавий типдаги автобус бекатлари тўлиқ битказилиб, фойдаланишга топширилмаган. Бу ҳақда Коррупцияга қарши курашиш агентлиги хабар берди.

QALAMPIR.UZ’нинг 17 июль куни “4 та темир, 1 та том. “Замонавий бекатлар” қаерда?” номли журналистик суриштируви эълон қилингач, у турли муҳокамаларга сабаб бўлди. Жумладан, Коррупцияга қарши курашиш агентлиги ҳам ушбу материалда кўрсатиб ўтилган камчиликлар юзасидан 20 июль куни Тошкент шаҳар ҳокимлигида ўрганиш ишларини олиб борди. Жараёнда, ҳокимлик томонидан қатор камчиликларга йўл қўйилганлиги аниқланди.

Маълум бўлишича, пойтахтда жами 2 871 та бекат мавжуд. Шундан 266 таси замонавий типдаги бекатга айлантирилиши учун электрон аукционга чиқарилган. Aукционда “Ewi snacks” МЧЖ ғолибликни қўлга киритган. Тадбиркорга ижтимоий бекат сифатида қўшимча 230 та бекат ҳам қайта реконструкция қилиш учун топширилган. Шундай қилиб, “Ewi snacks” МЧЖ жами 496 та бекатни йилнинг охирига қадар қуриб битказиш мажбуриятини олган.

Коррупцияга қарши курашиш агентлигининг текшируви давомида, 2026 йил май-июнь ойларида 60 та ижарага олинган ва 60 та ижтимоий, жами 120 та бекат фойдаланишга топширилиши кераклиги аниқланган. Бироқ кўплаб бекатларда қурилиш-монтаж ишлари якунланмагани, зарур жиҳозлар тўлиқ ўрнатилмагани ҳамда фойдаланишга топширилиши режалаштирилган 120 та бекатнинг бирортаси бўйича ҳам қабул қилиш далолатномаси расмийлаштирилмагани маълум бўлди.

Шу боис агентлик томонидан Тошкент шаҳар ҳокимлиги шартнома ва битимда белгиланган мажбуриятларнинг ўз вақтида ва тўлиқ бажарилишини, бекатларни тасдиқланган техник талабларга мувофиқ жиҳозлаш ҳамда фойдаланишга топшириш жараёнини қатъий назоратга олиш бўйича огоҳлантирилди.

Ҳокимлик вакиллари мазкур ўрганиш ишлари бўйича расмий изоҳ бериб, аниқланган камчиликларни тан олди.

“Айрим объектларда ҳали ҳам камчиликлар мавжудлигини тан оламиз” дейилади хабарда.

Шунингдек, ҳокимлик томонидан берилган хабарда транспорт инфратузилмасини янгилаш фақат бекат конструкцияларини ўрнатиш билан чекланмаслиги, бу жараён майдонларни тайёрлаш, ускуналарни улаш, атроф ҳудудни ободонлаштириш, шунингдек, тегишли хизматлар билан лойиҳавий ечимларни келишишни ҳам ўз ичига олиши ҳамда бошланган барча ишлар изчил равишда якунига етказилиши маълум қилинган.