Байденда простата саратони аниқланди

АҚШнинг собиқ президенти, 82 ёшли Жо Байденга агрессив простата саратони ташхиси қўйилди. Бу ҳақда кеча, 18 май куни унинг матбуот котиби маълум қилди.

“Президент Жо Байден ўтган ҳафтада тез-тез сийиш аломатларини сеза бошлаганидан сўнг простата бези тугунини текшириб кўрди”, дейилади баёнотда.

16 май куни унга простата саратони ташхиси қўйилди, бу Глисон балли 9 балл (5-даражали гуруҳ) суякларга метастазлар билан тавсифланади.

Таъкидланишича, гап “касалликнинг янада агрессив шакли” ҳақида кетаётган бўлса-да, саратон ўсимтаси, афтидан, “гормонларга сезгир бўлиб, уни самарали даволашга имкон беради”.

“Жо Байден ва унинг оиласи даволаш усулларини баҳолаш учун шифокорлари билан ишламоқда”, дейилади баёнотда.

CNN манбасига таяниб хабар беришича, Байден шу дам олиш кунлари Делавер штатидаги Уилмингтондаги уйида.

“Бир неча кун аввал Байденнинг матбуот котиби АҚШнинг собиқ президенти яқинда простата безида топилган “кичик бўлак” туфайли текширувдан ўтганини айтди”, деб хабар бермоқда CNN.

АҚШ Президенти Дональд Трамп ўзи ва рафиқаси Мелания номидан кеча, 18 май оқшомида  Жо Байденга тезроқ тузалиб кетишини тилади.

“Мелания ва мен Жо Байденнинг яқинда қўйилган тиббий ташхиси ҳақида қайғудамиз. Жилл ва унинг оиласига энг самимий ва энг яхши тилакларимизни билдирамиз ҳамда Жога тез ва муваффақиятли тузалиб кетишини тилаймиз”, деб ёзди Оқ уйнинг амалдаги раҳбари ўзининг Truth Social ижтимоий тармоғида.

Ўз навбатида, АҚШнинг собиқ президенти Барак Обама Байден саратонга қарши “қатъият ва иноят” билан курашишига ишонч билдирди.

“Мишель ва мен бутун Байден оиласи ҳақида ўйлаяпмиз. Ҳеч ким Жодан кўра саратоннинг барча шаклларида илғор даволаш усулларини излагани йўқ ва ишончим комилки, у ўзининг қатъиятлилиги ва инояти билан бу қийинчиликка қарши курашади. Биз унинг тез ва тўлиқ тузалиши учун ибодат қиламиз”, деб ёзди у Х ижтимоий тармоғида.

АҚШнинг собиқ вице-президенти ва Демократик партиядан 2024 йилги президентлик сайловига номзод Камола Ҳаррис ўзининг Х микроблогида шундай таъкидлади:

“Жо – жангчи. Биламан, у бу қийинчиликка доимо ўзининг ҳаёти ва етакчилигини белгилаб берган бир хил куч, чидамлилик ва некбинлик билан дуч келади. Биз тўлиқ ва тез тикланишни кутамиз”.