Байден ва Сунак авторитарларга қарши бирга курашишга келишиб олди

Бугун, 12 апрель куни Буюк Британия Бош вазири Риши Сунак Бельфастда АҚШ Президенти Жо Байден билан учрашди. Томонлар Шимолий Ирландиядаги сиёсий вазият ва глобал иқтисодий муаммоларни муҳокама қилди. Бу ҳақда Британия ҳукумати раҳбари идораси тарқатган баёнотда сўз борди.

“Бош вазир Президент Байденга Америка фуқаролари ва корхоналари Шимолий Ирландиянинг гуллаб-яшнашида кўп миллиард фунт стерлинг сармоя киритиб, ўн минглаб иш ўринлари яратгани учун миннатдорлик билдирди”, дейилади баёнотда.

Шунингдек, Сунак ва Байден музокаралар чоғида Лондон ва Вашингтон ўртасидаги иқтисодий ҳамкорликни чуқурлаштириш масалаларига ҳам тўхталган. Улар авторитар раҳбарлар томонидан глобал бозорларни манипуляция қилиниши ҳар қачонгидан ҳам АҚШ ва Буюк Британиянинг иқтисодий саломатлиги ва хавфсизлигини сақлаш учун биргаликда ишлаши зарурлигини тақозо қилишини таъкидлаган.

Етакчилар май ойида Японияда бўлиб ўтадиган G7 саммитида ва июнь ойида Сунакнинг Вашингтонга ташрифи чоғида иқтисодий хавфсизлик масалаларини муҳокама қилишни давом эттириш ниятида экани қайд этилган. Бундан ташқари, улар G7 ва G20 каби глобал форумлардан иқтисодий мажбурлаш ва бозор манипуляциясига қарши курашиш ҳамда мамлакатлар иқтисодий фаровонлигини ошириш учун фойдаланиш муҳимлиги ҳақида фикр алмашган.