Бангкокда йўл чўкиб кетиб, катта кратер ҳосил бўлди (видео)

Кеча, 24 сентябрь куни Таиланд пойтахти Бангкок шаҳрида ер ўпирилиши оқибатида йўл чўкиб, катта чуқур пайдо бўлди. Бу ҳақда “The Independent” хабар берди.

“Бангкокдаги шифохона биноси олдида 50 метр чуқурликдаги чўкиш юз берди. Оқибатда автомобиллар ва электр устунлари ер остига қулади. Ҳодиса шаҳарликларни ларзага солди. У яқин атрофда қурилаётган метро станцияси билан боғлиқ”, дейилади хабарда.

Гувоҳлар ҳодисани видеога олган. Кадрларда йўл тезлик билан чўкиб кетаётгани кўринади. Бундан ташқари, ҳосил бўлган чуқурга устунлар ҳам қулаб тушган. Видеода ҳодиса вақтида одамлар машиналарини ташлаб кетаётгани ва узоқроққа қочишга урингани ҳам акс этган.

Маълумотларга кўра, воқеа оқибатида қувурлар ҳам ёрилиб кетган. Шу сабабли ҳокимият шифохона биноси атрофидаги йўлларни ёпишга ва беморларни эвакуация қилишга мажбур бўлган. Шаҳар губернатори Чадчарт Ситтипунтнинг сўзларига кўра, ҳеч ким жабрланмаган, аммо учта автомобиль шикастланган.

Эслатиб ўтамиз, аввалроқ айни кунларда кузатилаётган кучли тўфон ортидан Тайваннинг Хуалянь туманида тўғон ёрилиши оқибатида камида 14 киши ҳалок бўлганди. Хуалянь шаҳридаги кўчкилар туфайли ҳосил бўлган кўл Рагаса тўфони олиб келган кучли ёғингарчилик сабабли қирғоғидан тошиб кетган ва Гуанфоу қишлоғини сув босиб, оқим қишлоқни вайрон қилган.