Баку AZAL қасддан қилинган ҳужум оқибатида қулаган деб ҳисобламайди – Алиев

Баку AZAL самолётининг Қозоғистоннинг Ақтау яқинида ҳалокатга учрашига қасддан уюштирилган ҳужум сабаб бўлган деб ҳисобламайди. Бу ҳақда Озарбайжон Президенти Илҳом Алиев “Fox News”га берган интервьюсида сўз очди.

Алиевнинг айтишича, Баку айбни расман тан олишни талаб қилади.

“Бизнинг ягона талабимиз – бу фактни тан олиш, жиноят айбдорларини жазолаш ва тўлиқ компенсация тўлаш”, дейди у.

Президентнинг сўзларига кўра, самолёт Россиянинг Грозний шаҳри ҳудудида ташқи таъсир оқибатида шикастланган ва бу бошқарувни йўқотишга олиб келган. Жорий йилнинг июль ойида у Озарбайжон Россияга қарши ҳалокат бўйича халқаро суд инстанцияларига мурожаат қилиш учун ҳужжатлар тайёрлаётганини маълум қилган.

Маълумот учун, 2024 йил 25 декабрь куни Бакудан Грознийга учаётган AZAL авиакомпаниясига тегишли самолёт Ақтау шаҳри яқинида қулаб тушган эди. Самолёт бортида жами 67 киши бўлган – 62 нафар йўловчи, 5 нафар экипаж аъзоси. Уларнинг орасида Озарбайжон, Россия, Қирғизистон ва Қозоғистон фуқаролари бор эди. Ҳалокат оқибатида 38 киши, жумладан 6 нафар қозоғистонлик ҳалок бўлган. 29 киши тирик қолган, улардан иккитаси борт кузатувчиси  бўлган.

“Росавиация” самолёт туман сабабли Грознийга қўна олмаганини ва Украина ҳужумлари сабаб жорий этилган “Ковер” режаси амал қилганини билдирган. Россия Президенти Владимир Путин эса ўша пайтда Чеченистонда дрон ҳужуми қайтарилгани ва ҳаво мудофаа тизими ишлаганини айтган. Шунингдек, Путин ўтган йилнинг декабрь ойида Алиевга қўнғироқ қилиб, “самолёт билан боғлиқ фожиали ҳодиса Россия ҳаво ҳудудида юз бергани” учун узр сўраган.

Эслатиб ўтамиз, аввалроқ Қозоғистон ҳукумати AZAL авиакомпаниясига тегишли самолётнинг Ақтау яқинида қулашига оид тергов натижалари бир неча ойдан кейин эълон қилинишини маълум қилганди. Ҳозирда ҳалокатга учраган самолётнинг баъзи деталлари чет элда экспертиза қилинмоқда. Тергов жараёнида бир нечта хорижий мамлакатлардан жалб қилинган халқаро мутахассислар ҳам иштирок этмоқда.