Уоррен Баффетт Эпштейн сабаб Гейтс жамғармасига хайрияни тўхтатди

Америкалик миллиардер ва инвестор Уоррен Баффетт ҳар йили йил ўртасида амалга оширадиган кўп миллиард долларлик хайриясини ҳозирча Билл ва Мелинда Гейтс жамғармасига ўтказмайди. Бу ҳақда “The Wall Street Journal” манбаларга таяниб хабар берди.

Нашрнинг ёзишича, Баффетт жамғарманинг жинсий жиноятларда айбланган Жеффри Эпштейн билан алоқалари бўйича ўтказилаётган мустақил текширув натижаларини кутишга қарор қилган. 

Қайд этилишича, Гейтс жамғармаси бош директори Марк Сузман жамғарманинг ўтмишдаги Эпштейн билан алоқаларини баҳолаш учун мустақил ташқи текширув тайинлаган. Текширув хулосалари жорий ёз мавсумида эълон қилиниши кутилмоқда. 

WSJ маълумотига кўра, Баффетт хайрия бўйича якуний қарорини йил охирига, эҳтимол анъанавий “Шукроналик куни” муносабати билан йўллайдиган очиқ мактуби вақтига қадар кечиктирган. 95 ёшли Уоррен Баффетт сўнгги йигирма йил ичида Berkshire Hathaway акцияларининг 47 миллиард доллардан ортиқ қисмини Гейтс жамғармасига хайрия қилган. 

Маълумот учун, Гейтс жамғармаси раиси Билл Гейтснинг Эпштейн билан муносабатлари сўнгги вақтларда кескин муҳокамаларга сабаб бўлмоқда. Microsoft корпорацияси ҳаммуассиси Билл Гейтснинг обрўси Адлия вазирлиги Эпштейнга оид ҳужжатларни эълон қилганидан кейин жиддий зарар кўрди.

70 ёшли Гейтсга нисбатан ҳеч қандай жиноий айблов қўйилмаган.

У бир неча бор Эпштейн билан алоқада бўлганидан афсусда эканини билдирган ҳамда Эпштейннинг жинсий зўравонлик қурбонлари билан вақт ўтказганини рад этган. Шунингдек, у Эпштейн томонидан содир этилган жиноий хатти-ҳаракатларга шахсан гувоҳ бўлмаганини таъкидлаб келади.

Эслатиб ўтамиз, аввалроқ Microsoft асосчиси Билл Гейтс АҚШ Конгресси аъзоларига жинсий жиноятларда айбланган Жеффри Эпштейн уни никоҳдан ташқари муносабатлари орқали шантаж қилишга уринганини айтган эди.