Азар судланиши мумкин

Бельгия терма жамоасининг собиқ футболчиси Эден Азар қимор ўйинларини тарғиб қилгани учун судга тортилиши мумкин. Бу ҳақда “Het Laatste Nieuws” нашри хабар берди.

Маълумотларга кўра, Бельгия қимор комиссияси собиқ футболчига нисбатан тергов бошлаган. Бунга Азарнинг яқинда Бельгияда ноқонуний ҳисобланган букмекерлик компаниясининг элчиси бўлгани сабаб бўлган.

Қайд этилишича, ушбу компания ўз брендини тарғиб қилиш учун аввал ҳам бир қатор машҳур футболчиларни жалб қилган. Улар орасида собиқ дарвозабон Икер Касильяс ва аргентиналик футболчи Серхио Агуэро ҳам бор.

Манбага кўра, Азар компаниянинг маркетинг кампанияларида иштирок этган ҳамда рақамли платформаларда мухлислар билан мулоқот қилган. Компания уни ижтимоий тармоқларда машҳурлиги сабаб танлаган. Масалан, футболчининг фақат Instagram саҳифасида 27 миллиондан ортиқ обуначи бор.

Маълумот учун, Эден Азар узоқ давом этган жароҳатлар туфайли 2023 йилда профессионал футболчилик фаолиятини якунлаган эди.

Эслатиб ўтамиз, аввалроқ “Астон Вилла” клуби ва Аргентина терма жамоаси дарвозабони Эмилиано Мартинес Англия футбол ассоциацияси (FA) томонидан пул тикиш рекламаси қоидаларини бузганлик эҳтимоли билан текширилаётгани ҳақида хабар берилган эди.