Асаубаева Президентга шикоят йўллади (видео)

Қозоғистонлик машҳур шахматчи, халқаро гроссмейстер ва аёллар ўртасидаги жаҳон рейтинги етакчиларидан бири бўлган Бибисора Асаубаева Спорт вазирлиги унинг маошини уч баробарга қисқартирилганини даъво қилиб, мамлакат Президенти Қосим-Жомарт Тўқаевга видеомурожаат йўллади. Бу ҳақда Асаубаева Instagram саҳифасида маълум қилди.

Спортчининг таъкидлашича, у нуфузли Норвегия 2026 турнирида ғолиб чиққан бўлса-да, мусобақага тайёргарлик жараёни ўз маблағлари ва ота-онасининг кўмаги ҳисобидан молиялаштирилган.

Шунингдек, жамоада ишлаган таҳлилчилар ва секундантлар хизмати учун ҳалигача тўлов амалга оширилмаган.

Асаубаева ўз мурожаатида мамлакатда шахмат бўйича жаҳон чемпионлари деярли йўқлигини таъкидлаб, спортчиларни қўллаб-қувватлаш тизимидаги муаммоларга эътибор қаратди.

“Жаҳон чемпионатидаги ғалаба учун Спорт вазирлиги томонидан ажратилган мукофот атиги 2 минг долларни ташкил этади. Олимпия ўйинлари медали учун эса – 250 минг доллар берилади. Қозоғистонда мендан бошқа эркаклар ёки аёллар ўртасидаги жаҳон чемпионлари йўқ”,  дейди шахматчи.

Унинг сўзларига кўра, 2023 йилдан бери олиб келаётган давлат маоши 2025 йилда янги спорт вазири келгач уч баравар қисқартирилган. Шу билан бирга, у Қозоғистон шахмат федерациясидан ҳеч қачон маош олмаганини маълум қилди.

Шахматчи шу йил бошида блиц йўналишидаги жаҳон чемпионатида учинчи олтин медалини қўлга киритиб, аёллар ўртасидаги Жаҳон шахмат тожи учун номзодлар турнирига йўлланма олган. Бироқ муҳим мусобақага тўлиқ тайёргарлик кўриш учун зарур маблағ ажратилмагани сабабли, унинг жамоаси масофадан ишлашга мажбур бўлган.

Асаубаева, шунингдек, давлат томонидан ваъда қилинган қўллаб-қувватлаш амалга ошмагани, турли идораларга юборилган мурожаатлар эса жавобсиз қолганини айтди.

Маълумот учун, Бибисора Асаубаева яқинда Ослода бўлиб ўтган нуфузли Норвегия турнирида муддатидан аввал чемпионликни қўлга киритиб, мусобақа тарихида бундай натижага эришган илк қозоғистонлик шахматчига айланди.

Шунингдек, янгиланган FIDE рейтингига кўра, у аёллар ўртасида жаҳон рейтингида биринчи ўринга кўтарилди.