“Арсенал” Винисиус билан шахсий шартнома шартларини келишиб олди

Англиянинг “Арсенал” клуби Испаниянинг “Реал Мадрид” жамоаси ҳужумчиси Винисиус Жуниор билан шахсий шартнома шартлари бўйича келишувга эришди. Бу ҳақда “Football365” портали хабар берди.

Манбага кўра, Лондон клуби яқин кунларда “Реал Мадрид”га футболчини трансфер қилиш бўйича расмий таклиф юборади. Бироқ таклиф суммаси ҳозирча ошкор этилмаган.

Аввалроқ, “The Telegraph” нашри “Арсенал” Винисиусга клуб тарихидаги энг юқори маошни таклиф қилишга тайёрлиги ҳақида хабар берган эди.

Таъкидланишича, унга “Реал Мадрид”да олаётган маошидан ҳам кўпроқ ҳақ тўлаш режалаштирилган. Айни пайтда бразилиялик футболчининг ҳафталик маоши 400 минг фунт стерлингни ташкил қилади.

Маълумот учун, 26 ёшли Винисиус 2018 йилнинг ёзида “Реал Мадрид”га ўтган ва клуб билан 2026-2027 йилги мавсум якунига қадар амал қиладиган шартнома имзолаган. У “Реал” сафида барча мусобақаларда 375 та учрашувда майдонга тушиб, 128 та гол урган ва 100 та голли узатмани амалга оширган.