Ароқчи Путинга Эрон олий раҳбарининг мактубини етказди

Кеча, 17 апрель куни Эрон Ташқи ишлар вазири Аббос Ароқчи Москвада Россия Президенти Владимир Путин билан учрашди. Бу ҳақда Эрон ТИВ ва Кремль маълум қилди.

Учрашувда Россия томонидан Ташқи ишлар вазири Сергей Лавров ва Президент ёрдамчиси Юрий Ушаков, Эрон томонидан эса Эроннинг Россиядаги Фавқулодда ва мухтор элчиси Козим Жалолий ҳам иштирок этди.

Аббос Ароқчи Эрон олий раҳбари Оятуллоҳ Али Хоманаийнинг Россия Президентига ёзма мактубини тақдим этди ва Теҳроннинг икки томонлама муносабатлар кун тартибидаги масалалар, шунингдек, минтақавий ва халқаро ўзгаришлар бўйича қарашлари ва позицияларини тушунтирди.

Ароқчи Эрон ва Россия ўртасида кенг қамровли стратегик шериклик шартномаси имзоланишининг аҳамиятига икки давлат ўртасидаги ҳамкорликнинг энг муҳим кўриниши сифатида ишора қилиб, Теҳроннинг Москва билан икки томонлама муносабатларни барча даражаларда мустаҳкамлаш ва кенгайтириш борасидаги қатъиятини таъкидлади.

Россия Президенти Владимир Путин Эрон олий раҳбарига салом ва саломатлик тилар экан, Эрон ва Россия ўртасидаги стратегик шерикликнинг аҳамиятига урғу бериб, икки давлат ўртасидаги алоқаларни мустаҳкамлаш, минтақавий ва халқаро масалаларда ҳамкорлик ва мувофиқлаштириш билан бирга икки халқ манфаатларига хизмат қилишини ҳамда тинчлик ва барқарорликни сақлаш ва мустаҳкамлашга ҳамоҳанг эканини айтди.

Учрашувда икки томонлама муносабатлар, минтақавий муаммолар ва мавжуд таҳдидлардан ташқари, Украина бўйича музокараларнинг сўнгги ҳолати, ядро муаммоси ва халқаро муаммолар муҳокама қилинди.

Музокаралардан сўнг Эроннинг Москвадаги элчихонасида Ташқи ишлар вазири иштирокида Эрон Ислом Республикасининг Армия кунига бағишланган тантанали маросим бўлиб ўтди. Тадбирдан сўнг Аббос Ароқчи Москвадаги музокаралар ҳақида ОАВга баёнот берди.

“Ушбу сафарда мен, биринчи навбатда, олий раҳбарнинг мурожаати, у ёзган ва турли мавзуларни, ҳам минтақавий муаммолар, ҳам икки томонлама муҳокамалар ва Россия билан давом этаётган ҳамкорликни қамраб олган хабарнинг ташувчиси бўлдим. Ушбу мактубда олий раҳбар Россия Президенти билан муҳокама қилмоқчи бўлган муҳим фикрлар мавжуд эди. У ўша ерда мактубни ўқиб чиқди, кейин мен қўшимча тушунтиришлар бердим, кейин икки томонлама ва минтақавий ҳамкорлик ҳақида батафсил суҳбатлашдик”, деди Ароқчи.

Унинг айтишича, Россия Президенти билан учрашувда баъзи минтақавий муаммолар, шунингдек, халқаро воқеалар, айниқса, Эрон билан АҚШ ўртасида билвосита олиб борилаётган музокаралар ҳамда Россия ва АҚШ ўртасидаги музокаралар атрофлича муҳокама қилинган.

“Ҳақиқат шундаки, биз АҚШдан қарама-қарши ва зиддиятли хабарларни эшитяпмиз. Бу нимани англатади ва қандай мақсадларни ўз ичига олади, бу уларга боғлиқ. Бизнингча, музокаралар столида (билвосита ва воситачилар орқали) айтилган нарса ҳал қилувчи мезон ҳисобланади. Ўзаро бу позициялар бўйича ўз фикрларимизни ҳам жиддий ва аниқ билдирганмиз.  Биз бу музокараларга жуда жиддий қараймиз. Ушбу музокараларда бизнинг позицияларимиз аниқ ва биз уларни бошқа тарафга аниқ билдирганмиз. Бизнинг сўзларимиз ўзгармаган ва ўзгармайди ва биз ҳар куни бир хил тарзда гапирамиз. Музокараларда бошқа томонларимиз ҳам жиддийлик, ҳам фикр барқарорлиги, ҳам қатъий қадам билан қатнашишини кутамиз. Шундагина музокаралар олдинга силжиши ва фойдали тараққиётга эришиши мумкин. Биз шанба куни билвосита музокараларда жиддий қатнашамиз ва бошқа томоннинг мавжудлигидан келиб чиқиб, бу йўлда қандай давом этишимиз кераклиги ҳақида хулоса чиқарамиз”, дейди вазир.

Эрон ТИВ раҳбарига кўра, Хитой ҳам, Россия ҳам, Эрон билан яқин ва узоқ муносабатларга эга бўлган барча давлатлар ҳам музокаралар жараёнини олға суришга ёрдам беришга тайёр эканини билдирган.

“Эроннинг билвосита бўлса-да дипломатик жараённи очишга тайёрлиги мен гаплашган барча давлатлар томонидан мамнуният билан қабул қилинди ва уларнинг барчаси бир вақтнинг ўзида бу йўналишда ёрдам беришга тайёр эканликларини билдирдилар. Биз буни ҳозирда Уммон орқали амалга оширмоқдамиз.  Бу борада Россия, албатта, ёрдам бериши мумкин”, деди Ароқчи.

Эслатиб ўтамиз, 11 апрель куни Россия Президенти Владимир Путин Санкт-Петербургдаги президент кутубхонаси биносида Америка етакчисининг махсус вакили Стив Уиткофф билан учрашув ўтказганди. Шундан сўнг, Уиткофф Эрон масаласини ҳал қилиш учун Уммонга ташриф буюрган. Баъзи бир таҳлилчиларга кўра, икки учрашув бир-бирига боғлиқ бўлиши мумкин.