Арманистон ва Озарбайжон тинчлик битими бўйича келишувга эришди

north_east

Пашинян Бакуга ўзаро даъволардан воз кечишни таклиф қилди

Арманистон ва Озарбайжон ўнлаб йиллар давом этган можароларида тинчлик битими бўйича келишувга эришди. Бу ҳақда Озарбайжон Ташқи ишлар вазири Жайҳун Байрамов бугун, 13 март куни журналистларга маълум қилди.

“Арманистон билан тинчлик шартномаси матни бўйича музокаралар жараёни якунланди”, деди Байрамов.

Арманистон Ташқи ишлар вазирлиги ҳам “Арманистон Республикаси ва Озарбайжон Республикаси ўртасида тинчлик ва давлатлараро муносабатлар ўрнатиш тўғрисида”ги шартнома имзолашга тайёрлигини маълум қилди.

“Ереван ҳужжатни имзолаш вақти ва жойи бўйича Баку билан маслаҳатлашувларни бошлашга тайёр”, дейилади ТИВ баёнотида.

Арманистон Ташқи ишлар вазирлиги, шунингдек, дипломатик каналлар орқали Озарбайжон Ташқи ишлар вазирлигига Арманистон қўшни давлатнинг тинчлик келишуви лойиҳасининг келишилмаган икки моддаси бўйича таклифларини қабул қилишини маълум қилди.

Бундан ташқари, Ереван тинчлик шартномасини келишиш бўйича музокараларни якунлаш бўйича қўшма баёнот эълон қилишни таклиф қилгани, бироқ “расмий Баку бир томонлама баёнот беришни маъқул кўргани” хабар қилинган.

Арманистон Бош вазири Никол Пашинян Озарбайжон билан музокаралар якунланганини муҳим воқеа деб атади. Унинг сўзларига кўра, ҳужжат муросадир, чунки унда икки банд бўйича имтиёзлар мавжуд.

“Ушбу қоидалар учун идеал матн туза олмаслигимиз аён бўлгач, биз Хавфсизлик Кенгаши форматида муҳокамалар ўтказдик ва ҳужжатнинг мавжуд мазмунини мақбул бўлиши мумкин бўлган муроса варианти деб ҳисоблаш мумкин деган хулосага келдик”, деб таъкидлади у.

Пашиняннинг сўзларига кўра, тинчлик битими матнида Европа Иттифоқининг Арманистонда бўлган кузатувчилари ҳақида ҳеч қандай гап йўқ, бироқ учинчи давлат кучларини киритмаслик ҳақидаги банд бор.

“Бу ҳужжат кучга киргач, Арманистон ҳам, Озарбайжон ҳам чегаранинг бутун узунлиги бўйлаб учинчи давлат қўшинларини жойлаштирмаслиги керак, деган маънони англатади”, дея тушунтирди у.

Пашинян, шунингдек, “келишув лойиҳасида фақат Арманистон ёки Озарбайжонга тегишли банд йўқлигини” таъкидлади, уларнинг барчаси ҳар икки давлатга бирдек тегишли.

Ереван ва Баку ўртасида тинчлик музокаралари

Аввалроқ Арманистон ва Озарбайжон тинчлик шартномасининг 17 та бандидан 15 таси бўйича келишиб олгани маълум бўлган эди.

Мувофиқлаштирилмаган ягона масала халқаро судларда ўзаро даъволардан тийилиш ва чегарага учинчи давлат кучларини киритмаслик ҳақидаги моддалар бўлди.

Тинчлик режасининг бир қисми сифатида Озарбайжон Арманистон Конституциясига ўзгартириш киритишни талаб қилмоқда.

Республика Асосий Қонунининг 1-моддасида Арманистон Олий Кенгаши томонидан 1990 йил 23 августда қабул қилинган мамлакат Мустақиллик Декларациясига ҳавола мавжуд. Ушбу декларациянинг бошида Арманистон ССР ва Тоғли Қорабоғнинг 1989 йилдаги “Бирлаштириш тўғрисида”ги қўшма қарорига ишора қилинган.

“Уларнинг конституциясидаги ушбу банд билан бу мумкин эмас, чунки конституция бошқа ҳар қандай ҳужжатдан, шу жумладан халқаро шартномадан ҳам устундир. Шундай экан, бир кун келиб улар ўз фикрини ўзгартириб, сентябрда қилган ишимизни яна қилишимиз керак бўладиган вазиятга тушиб қолишни истамаймиз”, дея ўз давлатининг позициясини тушунтирган эди Озарбайжон Президенти Илҳом Алиев.