Арманистон парламентида яна оммавий муштлашув бўлди (видео)

Арманистон Миллий мажлисининг навбатдан ташқари йиғилишида ҳукмрон ва мухолифат партия аъзолари ўртасидаги оғзаки баҳс муштлашувга айланди. Ҳодиса “24 News” телеканалининг You Tube саҳифасида жонли эфирда намойиш қилинди.

“News.am” нашрига кўра, йиғилишда “Арманистон” мухолиф блокидан депутат Артур Саркисянга нисбатан жиноий иш қўзғатишга розилик бериш ҳақидаги илтимоснома муҳокама қилинган.

“Ҳаммаси аллақачон ҳал бўлган ва тушунарли. Ҳибсга олиш ва депутатлик дахлсизлигидан маҳрум қилиш қарорлари ҳам қабул қилинган. Шу боис мен бу қимматли вақтни вояга етмаган фарзандларимга бағишлашга қарор қилдим. Тўрт фарзандим ва турмуш ўртоғим билан черковга борамиз. Шам ёқамиз ва сўнгра ўз хоҳишим билан Тергов қўмитасига бораман”, дейди Саркисян.

У, шунингдек, Миллий мажлис биносида қолишининг энди маъноси йўқлигини билдирган. Саркисяннинг қарори парламентдаги мухолифат вакиллари томонидан олқиш билан кутиб олинган.

Сўнг “Фуқаролик шартномаси” ҳукмрон партияси вакили, парламент раисининг ўринбосари Рубен Рубинян Саркисяннинг қарорига изоҳ беришга ҳаракат қилган. Залда эса чиқиб кетаётган Саркисяннинг жавоби эшитилган. Шундан сўнг ҳукмрон партия депутатлари ўринларидан туриб, Саркисянга баланд овозда бақира бошлаган ва унга мушт билан ташланган.

Рубинян вазиятни назорат остига ололмагани боис йиғилишга танаффус эълон қилган.

“Арманистон” мухолиф фракцияси депутати Кристине Варданяннинг айтишича, Артур Саркисян нутқидан сўнг залдан чиқмоқчи бўлганида “Фуқаролик шартномаси” партиясидан депутат Ваге Галумян уни ортидан қувиб бориб, орқадан ҳужум қилган.

“Артур Саркисян бугун депутатлик дахлсизлигидан маҳрум қилиниши кутилмоқда, шунинг учун бир неча соатни оиласи билан ўтказмоқчи эди. Аммо Галумян унинг ортидан югуриб, орқадан ҳужум қилди”, дейди у.

Варданяннинг сўзларига кўра, жанжалда ҳукмрон партия депутатларининг ёрдамчилари ҳам қатнашган.

Эслатиб ўтамиз, аввалроқ ҳам Арманистон парламенти мажлисида спикер ва мухолифат депутати ўртасидаги оғзаки тортишув охир-оқибат муштлашувга айланиб кетганди. Вазиятни бартараф этиш учун хавфсизлик хизмати жалб қилинган.