Аргентиналик телебошловчи Мессининг отаси вафот этганини айтди

Аргентиналик актриса ва телебошловчи Флоренсия Пенья Аргентина терма жамоаси сардори Лионель Мессининг отаси Хорхе Мессининг вафоти этганини айтди. Бу ҳақда у жонли эфир пайтида маълум қилди.

Бироқ орадан кўп ўтмай, бу маълумот ҳақиқатга тўғри келмаслиги аниқланди. Шундан сўнг, телебошловчи Мессининг оиласидан узр сўраб, хатоси учун масъулиятни ўз зиммасига олди.

“Месси оиласи бошидан кечираётган оғир вазият учун узр сўрайман. Бу дардни янада кучайтириб юборганимдан жуда ҳам уяламан. Тасдиқланган деб тақдим этилган бу ёлғон маълумот менга жонли эфир вақтида дастур продюсерлари томонидан берилган эди. Шунга қарамай, бу хато учун масъулиятни ўз зиммамга оламан. Мен адашдим ва чин дилдан кечирим сўрайман”, деб ёзди Пенья.

Шунингдек, айрим нашрлар Мессининг Жаҳон чемпионатида Жазоирга қарши учрашувдан кейин кўз ёш тўкканини отасининг саломатлиги билан боғлаган.

Бундан аввал, Мессининг оиласи ҳам расмий баёнот билан чиқиб, “айрим шахслар шахсий оилавий масалаларга нисбатан етарли даражада қатъий ҳурмат ва эҳтиёткорлик намоён этмаётгани”дан хавотир билдирган ва жамоатчиликдан вазиятни тушунишни сўраган эди.

Эслатиб ўтамиз, Лионель Месси Жаҳон чемпионатида Жазоирга қарши баҳсда хет-трик қайд этиб, Аргентина терма жамоасининг 3:0 ҳисобидаги ғалабасига ҳисса қўшган. Шунингдек, у Жаҳон чемпионатлари тарихидаги энг яхши тўпурарлар рўйхатида Германия терма жамоасининг собиқ ҳужумчиси Мирослав Клозе натижасига тенглашган.