Аргентина вице-президенти Англия футболчиларини “қароқчилар” деб атади

Аргентина вице-президенти Виктория Вильярруэль 2026 йилги Жаҳон чемпионати ярим финали доирасида бўлиб ўтадиган Англия – Аргентина учрашуви олдидан кескин баёнот билан чиқди. У ижтимоий тармоқдаги саҳифасида инглизларни “қароқчиларнинг авлодлари” деб атади.

“Биз қароқчиларнинг авлодларига қарши майдонга тушамиз. Бу шунчаки навбатдаги ўйин эмас. Мен сиёсий жиҳатдан тўғри гапиришга ёки ўзимни тийиб туришга уринмайман: инглизларга қарши баҳс ҳар доим футболдан ҳам каттароқ маъно касб этади. Бу Мальвина ороллари, бу Диего Марадона, бу Лео Мессининг сўнгги жаҳон чемпионати ва бу босқинчиларни тўхтатиш имконияти. Олға, Аргентина! Биз сўнгги нафасимизгача ўз ҳаққимизни талаб қиламиз”, деб ёзди Вильярруэль.

Маълумот учун, 1982 йилда Буюк Британия ва Аргентина мазкур архипелаг учун уруш олиб борган. Қуролли можаро оқибатида 649 нафар аргентиналик ва 255 нафар британиялик ҳарбий ҳалок бўлган.

Учрашув арафасида АҚШ Федерал қидирув бюроси (FBI), FIFA ҳамда маҳаллий полиция вакиллари қўшма йиғилиш ўтказиб, тарихий рақобат ва мухлислар ўртасида эҳтимолий тўқнашувлар хавфи сабабли ўйинни “энг юқори хавф” тоифасига киритган.

Вице-президентнинг баёнотидан фарқли ўлароқ, Аргентина терма жамоаси бош мураббийи Лионель Скалони аввалроқ спорт ва сиёсатни аралаштирмаслик кераклигини таъкидлаган эди.

“Бу шунчаки футбол ўйини. Кўп йиллар аввал содир бўлган воқеаларни бугунги спорт билан аралаштирмаслигимиз керак. Бу тарихимиздаги жуда ачинарли давр бўлган ва биз буни ҳурмат қилишимиз лозим”, деган Скалони матбуот анжуманида.

Англия ва Аргентина ўртасидаги ярим финал баҳси бугун, 15 июль куни АҚШда бўлиб ўтади. Учрашув ғолиби финалда Францияни 2:0 ҳисобида мағлуб этган Испанияга қарши майдонга тушади.