Apple M6 ва M5 Pro чипларидаги янги Mac mini’ни тақдим этди

Apple M6 ва M5 Pro процессорларига асосланган янги Mac mini компьютерларини тақдим этди. Бу ҳақда компания хабар қилди.

Қайд этилишича, янги авлод Mac mini компьютерлари M6 ва M5 Pro чиплари билан жиҳозланади. Apple қурилмалар, айниқса сунъий интеллект билан боғлиқ вазифаларда, ишлаш унумдорлиги сезиларли ошганини таъкидлаган.

Маълум қилинишича, M6 процессорли Mac mini’лар 32 ГБгача оператив хотира ва 2 ТБгача хотира билан, M5 Pro версиялари эса 64 ГБ оператив хотира ва 8 ТБгача ички хотира билан ишлайди.

Компания шунингдек, M5 Max ва M5 Ultra процессорларида ишлайдиган янги Mac Studio компьютерларини ҳам тақдим этган. Қурилмалар PCIe Gen 6 технологиясига асосланган янги авлод SSD архитектураси билан жиҳозланган бўлиб, Apple маълумотига кўра, у аввалги версиядан икки баравар тезроқ.

Apple M5 Ultra’ни компания тарихидаги энг кучли процессор деб атаган. Mac Studio’нинг M5 Ultra версияси 512 ГБгача, M5 Max версияси эса 128 ГБгача оператив хотирани қўллаб-қувватлайди. Шунингдек, Apple сайтида компьютерларни тозалаш учун махсус салфетканинг янги версияси ҳам пайдо бўлган. Унинг нархи 9 доллар этиб белгиланган.

Компаниянинг эълон қилишича, янги Mac mini’нинг базавий версияси 899 доллардан, Mac Studio эса 2 499 доллардан бошланади.

Эслатиб ўтамиз, аввалроқ Apple корпорацияси iPhone X смартфонини эскирган қурилма деб эътироф этди ва уни компания сайтидаги тегишли рўйхатга киритганди.