АПЛ тарихидаги энг ёмон трансфер эълон қилинди

Мутахассислар Англия Премьер-лигаси тарихидаги энг ёмон трансферларни аниқлади. Унда украиналик футболчи Михаил Мудрикнинг Лондоннинг “Челси” клубига ўтиши АПЛ тарихидаги энг ёмон трансфер деб топилди. Бу ҳақда ESPN нашри хабар берди.

Манбага кўра, ушбу рўйхатда иккинчи ўринни 2022-2023 йилги мавсумда Нидерландиянинг “Аякс” клубидан “Манчестер Юнайтед”га 95 миллион евро эвазига ўтган бразилиялик Антони эгаллади. Учинчи ўринни эса 2019-2020 йилги мавсумда Лондоннинг “Арсенал” клубига 80 миллион евро эвазига трансфер қилинган кот-д’ивуарлик қанот ҳужумчиси Николя Пепе банд этди.

Маълумот учун, Мудрик 2023 йил январь ойида Украинанинг “Шахтёр” жамоасидан “Челси”га 70 миллион евро эвазига қўшилганди. Лондон клуби украиналик футболчи билан 8,5 йиллик шартнома имзолаган. Уч йил давомида ярим ҳимоячи 73 та ўйинда майдонга тушиб, 10 та гол урди. 2024 йил декабрь ойида “Челси” Мудрикнинг допинг тести ижобий чиққанини эълон қилди. Ўшандан буён у бирорта ҳам расмий ўйинда майдонга тушгани йўқ.