Андижонда 2 “замҳоким” пора билан қўлга тушди

Андижон вилоятининг Бўстон тумани ҳокимининг инвестиция ҳамда қишлоқ ва сув хўжалиги масалалари бўйича ўринбосарлари пора олаётганда қўлга олинди. Бу ҳақда Давлат хавфсизлик хизмати хабар берди. 

Маълум қилинишича, ўринбосарлар ўзаро тил бириктириб, хизмат мавқеидан фойдаланган ҳолда, тумандаги фермер хўжаликнинг 500 минг долларлик экспорт режасини сохта экспорт операциялари орқали ёпиб бериш эвазига 65 млн сўм миқдорида пора талаб қилган.

Туман ҳокимининг қишлоқ ва сув хўжалиги масалалари бўйича ўринбосари жорий йилнинг август ойида сўралган пулнинг 25 млн сўмини “аванс” сифатида олади. Қолган қисмини эса, яъни 40 млн сўмни туман ҳокимининг инвестиция масалалари бўйича ўринбосари орқали олаётган пайтда ашёвий далиллар билан ушланган.

Ҳозирда ҳолат юзасидан мазкур мансабдор шахсларга нисбатан Жиноят кодексининг 210-моддаси (пора олиш) 2-қисми “в”, “г” бандлари билан жиноят иши қўзғатилиб, “қамоқ” эҳтиёт чораси қўлланган.

Эслатиб ўтамиз, аввалроқ Сурхондарё вилояти Шўрчи тумани давлат солиқ инспекциясининг солиқ инспектори пора билан қўлга тушганди. У хизмат мавқеидан фойдаланган ҳолда 1999 йилда туғилган фуқаро билан ўзаро тил бириктириб, маҳаллий тадбиркорга тегишли бўлган МЧЖнинг 19 млн 400 минг сўмлик солиқ қарздорлигини сўндириб бериш эвазига 8 млн сўм талаб қилган.