Анчелотти Бразилиянинг ЖЧдан чиқиб кетишига сув танаффусини сабаб қилиб кўрсатди

Бразилия терма жамоаси бош мураббийи Карло Анчелотти жамоасининг 2026 йилги Жаҳон чемпионатидаги муваффақиятсизлигига Норвегияга қарши 1/8 финал учрашувидаги сув танаффуси сабаб бўлганини айтди. Бу ҳақда у ESPN нашрига берган интервьюсида сўз очди.

Бразилия мазкур баҳсда Норвегияга 1:2 ҳисобида мағлуб бўлиб, 1990 йилдан бери илк бор Жаҳон чемпионатининг чорак финалига чиқа олмаганди.

“Менимча, биз Жаҳон чемпионатини Норвегияга қарши ўйиннинг танаффусида ютқаздик. Ўша пайтгача жамоа ўйинни тўлиқ назорат қилаётган эди. Норвегия тўпга кўпроқ эгалик қилишга ҳаракат қиларди, улар Англияга қарши ҳам шундай ўйнаган. Лекин биз вазиятни назорат қилиб тургандик ва ғалаба қозонишимиз мумкин эди”, дейди Анчелотти.

Италиялик мутахассиснинг тан олишича, у танаффус пайтида тактик ўзгариш киритиш орқали хатога йўл қўйган.

“Эҳтимол, энг катта хатоим ҳам шу бўлган. Мен, жамоа ўйинни назорат қила олмаяпти, деб ўйладим, аслида эса бундай эмас эди. Таркибда бир нечта ўзгариш қилдим ва шундан кейин Эрлинг Ҳоландни тўхтатишда муаммога дуч келдик”, дейди у.

Мазкур учрашувнинг иккинчи бўлимида Ҳоланд дубль қайд этди. Бразилияликлар эса фақат қўшимча вақтда Неймар пенальтидан урган гол эвазига ҳисобдаги фарқни қисқартиришга муваффақ бўлди.

Маълумот учун, 2026 йилги Жаҳон чемпионатида илк бор ҳар бир бўлимнинг 22-дақиқасида, об-ҳаво шароитидан қатъи назар, 3 дақиқалик мажбурий сув танаффуси жорий этилди. FIFA бу қарор футболчиларнинг сувсизланишини олдини олиш мақсадида қабул қилинганини маълум қилди.

Шу билан бирга, мазкур танаффуслар трансляция ҳуқуқига эга телеканалларга жонли эфир давомида қўшимча реклама намойиш этиш имконини берди.

Эслатиб ўтамиз, аввалроқ 2026 йилги Жаҳон чемпионати Америка телерадиокомпаниялари учун рекорд даражада реклама даромади келтиргани ҳақида хабар берилганди.