Инфантино Жаҳон чемпионатини кенгайтириш ғоясидан воз кечди

FIFA президенти Жанни Инфантино Жаҳон чемпионатини иштирокчиларини 64 тага етказиш режасидан воз кечди. Бу ҳақда “The Times” нашри хабар берди.

Манбага кўра, у турнирни ўтказиш ҳуқуқларининг бир қисмини сотиш режалари билан боғлиқ можаро ортидан юзага келган босимни юмшатиш мақсадида шундай қарорга келган. Таъкидланишича, Инфантино қайта сайланган тақдирда миллий терма жамоалар ёки клублар ўртасидаги Жаҳон чемпионатларини кенгайтиришга уринмайди.

Жорий йилнинг август ойида Инфантино Жанубий Америка футбол конфедерацияси (CONMEBOL) томонидан илгари сурилган 2030 йилги Жаҳон чемпионатини 64 та жамоага кенгайтириш таклифини қўллаб-қувватлаган.

Нашрнинг ёзишича, FIFA президенти турнирда кўпроқ мамлакатларга ўрин бериш орқали ўз мавқеини сақлаб қолиш учун зарур овозларни тўплаш ва кенгроқ коалиция қўллаб-қувватловига эришишни кўзлаган.

2026 йилги Жаҳон чемпионатидан сўнг Инфантино FIFA’нинг эркаклар ва аёллар ўртасидаги энг йирик турнирларини бошқарадиган алоҳида компания ташкил этишни режалаштиргани маълум бўлди. Унинг фикрича, FIFA Forward Enterprise компаниясини ташкил этиш аъзо ассоциациялар даромадларини ошириш ва бутун дунё бўйлаб футбол ривожига ҳисса қўшиши мумкин эди. FIFA ушбу лойиҳа орқали 4,2 миллиард доллар жалб этиш мумкинлигини билдирган.

Бироқ ташаббус футбол расмийлари, федерациялар ва бошқа ташкилотлар томонидан кескин танқид қилинди. UEFA, КОНКАКАФ, ОФК ва CONMEBOL лойиҳага қарши чиқди. UEFA, шунингдек, FIFA ҳомийлигидаги турнирларни бойкот қилиш билан таҳдид қилди.

Инфантино лойиҳадан воз кечганини эълон қилганидан кейин ҳам UEFA FIFA президентига нисбатан ишонч йўқолганини билдирди. “The Telegraph” нашрининг хабар беришича, UEFA Инфантино ўз ихтиёри билан истеъфога чиқмаса, унга нисбатан ишончсизлик овози беришни режалаштирмоқда.

Маълумот учун, FIFA президентлигига навбатдаги сайловлар 2027 йил март ойида Марокашда бўлиб ўтади. Инфантино 2016 йил февраль ойида фавқулодда конгрессда FIFA президенти этиб сайланган. Шундан сўнг у икки марта рақибсиз қайта сайланди.