Анчелотти Бразилиянинг ЖЧдан чиқиб кетишига изоҳ берди

Бразилия миллий терма жамоаси бош мураббийи Карло Анчелотти жамоасининг 2026 йилги Жаҳон чемпионатининг 1/8 финалида Норвегияга 2:1 ҳисобида мағлуб бўлгани юзасидан фикр билдирди.

Италиялик мутахассиснинг таъкидлашича, унинг шогирдлари ўйин давомида тўп назорати ва яратилган вазиятлар бўйича устунлик қилган, аммо бу устунликни голларга айлантира олмаган.

“Аввалига ўйинни назорат қилиб, хавфли вазиятлар яратаётгандек туюлди. Норвегия жуда кучли жамоа, шунинг учун уларга қарши юқори босим қўллаш осон эмас. Бундай рақибга қарши ортиқча босим ўтказишнинг ўзи ҳам хавфли. Бизга Бразилия футболига янги суръат бағишлайдиган иқтидорли ёшлар ва юқори савияли футболчилар керак. Менимча, биз яхши ўйнадик, аммо бу футбол. Баъзан мағлубиятни тан олишга тўғри келади”, деди Анчелотти.

Шунингдек, италиялик мураббий биринчи бўлимда белгиланган пенальтини нега Винисиус эмас, Бруно Гимарайнш тепганига ҳам изоҳ берди.

“Биз статистик маълумотларга таяндик. Биздаги футболчилар орасида энг яхши пенальтичи Рафинья эди. У майдонни тарк этганидан кейин навбат Неймарга, сўнг Игор Тиаго, Бруно Гимарайнш ва Габриэл Мартинеллига келарди. Биз Брунони энг тўғри танлов деб ҳисобладик”, деди Анчелотти.

Бруно Гимарайнш ушбу пенальтини аниқ амалга ошира олмади. Шу тариқа, у сўнгги 40 йил ичида Жаҳон чемпионати асосий вақтида пенальтидан фойдалана олмаган биринчи бразилиялик футболчига айланди. Бу статистика пенальтилар сериясини ўз ичига олмайди.

Маълумот учун, Бразилия Жаҳон чемпионати тарихида энг кўп – беш марта (1958, 1962, 1970, 1994 ва 2002 йилларда) чемпион бўлган ягона терма жамоа ҳисобланади. Бироқ жамоа сўнгги чемпионлигидан бери мундиал финалигача етиб бора олмаган.