Америкалик журналист Байденнинг ўғли билан боғлиқ шов-шувли воқеани ошкор қилди 

Тwitter’нинг эгаси, америкалик тадбиркор ва миллиардер Илон Маск ўзининг ижтимоий тармоқдаги саҳифасида журналист Мэтт Тайбби аккаунтига ҳавола жойлаштирди. Мэтт ўзининг саҳифасида Тwitter Америка Қўшма Штатлари Президенти Жо Байденнинг ўғли Хантер Байден билан боғлиқ шов-шувли воқеани яширгани тўғрисида далилларни келтирган. Бу ҳақда “Газета” хабар берди.

Гап Хантернинг ноутбугидан Украинанинг “Burisma” энергетика компанияси раҳбари Вадим Пожарский билан ёзишмалари топилгани ҳақида кетмоқда. Ўшанда Президентнинг ўғли ташкилот директорлар кенгаши аъзоси бўлган. Мактубларнинг бирида Пожарский Хантер Байдендан компанияга ёрдам бериш учун қандай қилиб ўз таъсиридан фойдаланиши мумкинлиги ҳақида ўйлашни сўраган.

Бироқ Тwitter Хантер Байденнинг иши билан боғлиқ ҳар қандай постларни ўчириб ташлаган ва фойдаланувчиларни тўғридан-тўғри блоклаб қўйган. 

Шунингдек, Тwitter сайловлар олдидан Жо Байден ва Дональд Трампнинг платформадаги контентини текшириш борасидаги сўровларни бажарган. Қолаверса, ижтимоий тармоқ Республикачилар партиясидан кўра, Демократлар билан яқинроқ алоқада бўлади.

Жорий йилнинг ноябрь ойи бошида SBS телеканали Хантер Байденнинг ноутбугидан топилган маълумотлар сохталаштирилмагани ҳақида хабар берган. Бироқ Президент Байден ўғлига ишонишини айтиб келади. Байденнинг иддао қилишича, терговчилар ва прокуратура Хантер Байденга қарши ҳеч қандай далил топмаган.

Эслатиб ўтамиз, Илон Маск Тwitter’ни сотиб олгач, ундаги цензураларни олиб ташлашни ва компаниянинг махфий маълумотларини оммага ошкор қилишини айтган эди. Журналист Мэтт Тайбби қўллаб-қувватлаш орқали Маск ўзининг режалари қатъий эканлигини билдирди. Чунки Тwitter’нинг олдинги раҳбарлари Тайббини дарҳол блоклаган бўларди.