Америка банки вице-президенти пичоқлаб кетилди

Америка банки (Bank of America) вице-президенти Нью-Йорк шаҳрининг “Times Square” майдонида пичоқ билан ҳужум қилиниши оқибатида ҳалок бўлди. Бу ҳақда “Reuters” хабар берди.

Нью-Йорк полициясининг маълумотига кўра, воқеа жорий йилнинг 31 август куни соат 16:24 атрофида Вест 42-кўчаси ва Еттинчи авеню кесишмаси яқинида содир бўлган. Полиция ҳужум тасодифий ва ҳеч қандай сабабсиз амалга оширилганини билдирган.

Ҳалок бўлган аёл 32 ёшли Эрин Пьяченти экани аниқланган. У Америка банкининг бизнес танлови ва манфаатлар тўқнашуви бўлимида вице-президент лавозимида ишлаган. Банк вакиллари унинг ўлимидан чуқур қайғуда эканини билдирган.

Шунингдек, ҳужум вақтида 68 ёшли эркак ҳам пичоқ жароҳатларини олган. У шифохонага ётқизилган ва аҳволи барқарор экани айтилган.

Полиция воқеа жойига етиб борганида ҳужумда гумон қилинаётган 49 ёшли Памела Сиснерос икки катта пичоқ билан қуролланган ҳолда уларга қараб юрган. Полициячилар унга қарата ўқ узган ва аёл кейинчалик вафот этган. Полиция комиссари Жессика Тишнинг айтишича, Сиснеросилгари руҳий саломатлиги билан боғлиқ муаммолар бўйича қайд этилган.

Америка банки хавфсизлик ходимлари полициянинг тергов ишларига ёрдам бераётганини маълум қилган.

Маълумот учун, Америка банки – АҚШдаги энг йирик банклардан бири ва мамлакатнинг молиявий хизматлар кўрсатиш бўйича етакчи компанияларидан ҳисобланади.

Эслатиб ўтамиз, аввалроқ Мексиканинг Кулякан шаҳрида TikTok блогери Сесар Гастелум дўстлари билан жонли эфир олиб бораётган вақтида номаълум қуролли шахслар томонидан отиб ўлдирилган эди.