Алиев гапини қайтариб олди: Қорабоғ урушида Туркия ёрдам берганини тан олди (видео)

Озарбайжон Президенти Илҳом Алиев Иккинчи Қорабоғ уруши давомида Туркия ва унинг халқи Озарбайжонни қўллаб-қувватлаганини айтиб, бу ёрдамни ҳеч қачон унутмаслигини билдирди. Бу ҳақда у бугун, 8 ноябрь куни Туркия Президенти Ражаб Тойиб Эрдўған билан ўтказилган қўшма матбуот анжуманида гапирди.

Алиевнинг айтишича, 44 кунлик уруш давомида Туркия Озарбайжоннинг ёнида турган. Урушнинг илк соатларида Эрдўғаннинг билдирган баёноти ва Алиев билан телефон орқали суҳбати бутун дунёга Туркия Озарбайжонни қўллаб-қувватлаётганини кўрсатган.

“Сизнинг тарихий сўзларингиз – “Озарбайжон ёлғиз эмас, Туркия унинг ёнидадир” деган баёнотиңиз бизга қўшимча куч ва руҳ берди. Буни ҳеч қачон унутмаймиз”, дейди Алиев Эрдўғанга қарата.

Озарбайжон раҳбари Туркия Президенти ва турк халқига кўрсатилган сиёсий ҳамда маънавий ёрдам учун шахсан миннатдорчилик билдирган.

Шунингдек, Алиев 44 кунлик уруш давомида Озарбайжон армияси 300 дан ортиқ шаҳар ва қишлоқни озод қилганини, жангларда 3 минг нафар ҳарбий ҳалок бўлганини айтган. У уларнинг қони ерда қолмаганини ва тарихий адолат тикланганини таъкидлаган.

Алиев 44 кунлик уруш Туркия ва Озарбайжон ўртасидаги бирликни яна бир бор намоён этганини қайд этган. Урушдан етти ой ўтиб, Шуша шаҳрида имзоланган декларация эса икки давлат муносабатларини расман иттифоқчилик даражасига олиб чиққанини айтган.

Эслатиб ўтамиз, жорий йилнинг октябрь ойи бошида – Туркия ва Озарбайжон муносабатлари ёмонлашган пайтда Илҳом Алиев ташқи сиёсат ҳақида кескин баёнот бериб, мамлакат ҳарбий ғалабаларга ўз кучи билан эришганини айтганди. Шунингдек, у Туркиядан олинган “Байрактар” дронларига шама қилиб, четдан қурол-яроғни пул эвазига сотиб олинганини қайд этганди ва ташқи ҳомийлик ҳақидаги иддаоларни рад этган эди.

Қайд этиш жоиз, сўнгги ойларда Анқара ва Баку ўртасидаги муносабатларда бир қатор масалалар бўйича келишмовчиликлар юзага келди. Сентябрь ойида Озарбайжон ҳукумати давлат мактаблари ўқувчиларининг ташқи кўринишини тартибга солувчи қоидаларга ўзгартиришлар киритди. Янги меъёрлар ягона мактаб формаси стандартини бузувчи ёки таълимнинг дунёвий хусусиятига мос келмайдиган кийим элементларини тақиқлайди.
Қарор Туркияда, жумладан, юқори сиёсий даражада танқидларга сабаб бўлди. Озарбайжон парламенти депутати Жайҳун Мамедов журналистларга ислоҳот таълим муассасаларида диний, этник ва ижтимоий-иқтисодий фарқларни бартараф этишга қаратилганини изоҳлади. Ҳужжатда “ҳижоб” сўзи тилга олинмаган бўлса-да, ўзгартиришлар уни ўрашга ҳам дахлдор бўлди.

Кейинчалик Озарбайжон ТИВ республикада ҳокимиятни зўравонлик билан ўзгартиришга чақиргани учун 31 нафар Туркия фуқаросини номақбул шахслар рўйхатига киритди. Бунга қадар Озарбайжон Бош прокуратураси мамлакатда ҳокимиятни зўравонлик билан эгаллаб олишга очиқдан очиқ чақириқлар қилиш бўйича жиноят иши доирасида етти нафар Туркия фуқаросини халқаро қидирувга берган эди.