АҚШ “Green Card” лотереяси қайта бошланганини маълум қилди

АҚШ ҳукумати грин-карта лотереясида иштирок этиш қоидаларини янгилашни режалаштирмоқда. Ўзгаришлар 2026 йил 10 апрелдан кучга кириши мумкин ва DV-2027 лотереясига тааллуқли бўлиши кутилмоқда. Бу ҳақда АҚШ Федерал реестри сайтида келтирилган.

Лойиҳага кўра, Diversity Visa Program (грин-карта лотереяси)да иштирок этиш учун амал қилувчи хорижга чиқиш паспорти талаб қилинади. Анкетага паспортнинг шахсий маълумотлар ва имзо жойлашган саҳифасининг сканерланган нусхасини бириктириши керак бўлади. Шунингдек, ариза топшириш учун рамзий тўлов – 1 доллар жорий этиш таклиф қилинмоқда. Яна бир ўзгариш анкета тўлдириш вақтига тегишли. Ҳозир бунинг учун 30 дақиқа берилади, янги қоидаларга кўра эса бу муддатни 90 дақиқагача узайтириш режалаштирилган. 

Давлат департаментига кўра, бу чоралар фирибгарлик билан берилган аризалар сонини камайтириш ва дастур шаффофлигини оширишга ёрдам беради. Шунингдек, дастур қоидаларида “гендер” ва “ёш” ўрнига “биологик жинс” ва “туғилган сана” атамаларини ишлатиш режалаштирилган. Консулликлар учун йўриқномаларга ҳам “shall” (“мажбур”) деган қоида қўшилмоқда. Бу консуллик ходимлари иштирокчилар маълумотларини қатъий текшириши шартлигини англатади.

Нималар ўзгармайди?

Лотереяда иштирок этишнинг асосий талаблари ўзгаришсиз қолади. Ариза берувчилар ҳануз:

• ўрта маълумот тўғрисидаги аттестат ёки унинг эквивалентини кўрсатиши;
• анкетада барча оила аъзолари ва турмуш ўртоғини киритиши;
• консулликдаги интервью пайтида маълумотларни тасдиқлаши керак.

Инглиз тилини билиш талаби ҳозирча йўқ ва бундай шартни киритиш режалаштирилмаяпти. Ўзгаришларнинг асосий сабабларидан бири – шубҳали аризалар сонининг жуда кўплиги. АҚШ ҳукуматининг маълумотига кўра, DV-2025 лотереяси пайтида тахминан 2,5 миллион шубҳали ёки такрорий анкета аниқланган.

Шу сабабли янги қоидалар, аввало, фирибгарлик ва қайта-қайта рўйхатдан ўтиш ҳолатларига қарши курашишга қаратилган.

Маълумот учун, грин-карта – бу АҚШда доимий яшовчи мақомини тасдиқловчи расмий ҳужжат. У қуйидаги ҳуқуқларни беради:

• АҚШда чекловларсиз яшаш ва ишлаш;
• ижтимоий имтиёзлардан фойдаланиш;
• кейинчалик фуқароликка ариза бериш.

Грин-карта лотареяси ҳар йили ўтказилади. Унда АҚШга миграция даражаси паст бўлган давлатлар фуқаролари, жумладан, Ўзбекистон фуқаролари ҳам иштирок этиши мумкин. Маълумот учун, 2025 йил 16 сентябрдан бошлаб грин-карта лотереясида иштирок этиш учун ариза топшириш 1 долларлик тўлов жорий қилинган. Илгари бу жараён тўлиқ бепул эди.

Эслатиб ўтамиз, ўтган йил декабрда грин-карта лотереяси дастури вақтинча тўхтатилганди. Идора раҳбари бу қарор АҚШ Президенти Дональд Трамп кўрсатмасига биноан қабул қилинганини билдирган. Сабаб сифатида Браун университети ва Массачусетс технология институти ҳудудларидаги отишмада гумон қилинган шахс 2017 йилда АҚШга айнан шу дастур орқали киргани айтилган.