АҚШнинг Германиядаги қуроллари урушнинг олдини олишга ёрдам беради – Шольц

Германия канцлери Олаф Шольц 2026 йилдан бошлаб Американинг узоқ масофага учувчи қуролларининг Германияда жойлаштирилишини урушнинг олдини олиш деб атади. Бу ҳақда кеча, 12 июль куни Берлинда Япония Бош вазири Фумио Кисида билан учрашувдан сўнг сўз очди.

“У тўхтатувчи таъсир туфайли хавфсизликни оширади, чунки сиз орқа томондан ҳужум қила олмайсиз. Биз ҳар доим урушнинг олдини олишга ҳаракат қиламиз”, дейди канцлер.

Бундан ташқари, Шольц Германия Украинага қурол етказиб бериш Россия билан тўғридан тўғри қарама-қаршиликка олиб келмаслиги учун назоратни давом эттиришини тасдиқлади.

“Бу ерда қабул қилаётган қарорларимиз ҳамиша мамлакатимиз ва иттифоқ хавфсизлигини таъминлашга қаратилгани ҳам бирдек равшан”, дейди Шольц.

“Reuters”нинг ёзишича, Шольц бир қатор немис сиёсатчиларининг янги Америка қуролларининг жойлаштирилиши Германиянинг Россия билан муносабатларининг кескинлашишини англатади, деган танқидни рад этди.

“Аксинча, Қўшма Штатлар Германиянинг иттифоқчиси сифатида европаликлар мавжуд мудофаа қуроллари тақчиллигини мустақил қопламагунча мамлакатни қўшимча ҳимоя қилади”, дея таъкидлади Шольц.

Берлиндаги учрашувда Шольц ва Кисида Германия ва Япония яқин иқтисодий мулоқот орқали Хитойга қарамлигини камайтириш чораларини кўришига келишиб олди.

“Reuters” хабарига кўра, Япония Бош вазири “Хитойнинг ортиқча ишлаб чиқариши”ни бошқа саноатлашган мамлакатлар учун зарарли деб атади.

Ўз навбатида, Германия ҳукумати раҳбари адолатли, эркин глобал савдога чақирди, бу эса тенг шароитларни талаб қилади. У Берлиндаги федерал ҳукумат ва уяли алоқа компаниялари ўртасида 2029 йил охиригача Хитойнинг Huawei ва ZTE компаниялари компонентларини 5G тармоқларида ишлатмаслик тўғрисидаги келишувни ҳимоя қилди.

Фумио Кисида, шунингдек, Хитойнинг саноат сиёсатига қўшма жавоб Ғарбий саноатлашган еттилик гуруҳи (G7)нинг сўнгги йиғилишида аллақачон келишилганини таъкидлади.

“Германия-Япония ҳукуматининг навбатдаги маслаҳатлашувлари 2025 йилда Германияда бўлиб ўтиши керак”, дея қайд этади агентлик.

Бироқ Хитойдан импорт қилинадиган электр транспорт воситаларига нисбатан жазо тарифлари бўйича баҳсда канцлер ЕИ ва Хитой ўртасидаги келишувга умид қилмоқда.

“Reuters” агентлигининг хабар беришича, федерал ҳукумат 15 июль куни Брюсселда бўлиб ўтадиган Хитойдан электромобиллар учун вақтинчалик жазо тарифлари бўйича Европа Иттифоқининг ички овоз беришда иштирок этишдан тийилиши мумкин. Ой бошида Еврокомиссия Хитойнинг ушбу турдаги электромобиль маҳсулотларига Хитойни ноҳақ рақобатда айблагани сабабли вақтинчалик жазо тарифларини жорий қилган эди.

Россия Ташқи ишлар вазирлиги Германияда Tomahawk  қанотли ракеталари ва бошқа узоқ масофага учувчи АҚШ қуролларининг жойлаштирилишини “эскалация йўналишидаги бўғин” деб ҳисоблайди.

Россия Ташқи ишлар вазири ўринбосари Сергей Рябковнинг сўзларига кўра, Россия биринчи навбатда, ушбу янги ўйинга ҳарбий жавобни ишлаб чиқади.

10 июль куни АҚШ Россияни тийиб туриш учун НАТОдаги Европадаги ҳамкорларини ҳимоя қилиш чораларини кучайтириши маълум бўлди. Хусусан, Tomahawk қанотли ракеталари ва бошқа узоқ масофага учувчи қуроллар 2026 йилдан бошлаб Германияда вақтинча жойлаштирилади.

Вашингтондаги НАТО саммити арафасида эълон қилинган АҚШ-Германия қўшма баёнотида СМ-6 зенит-ракеталари ва “Европадаги мавжуд ерга асосланган тизимларга қараганда анча узоқроқ масофага эга” гипертовушли қуролларнинг янги турлари ҳақида ҳам айтилган.

Шунинг учун Германияда “Совуқ Уруш”дан бери биринчи марта Россия ҳудудига етиб бора оладиган қурол тизимлари яна жойлаштирилади.

Tomahawk қанотли ракеталари, худди Германиянинг TAURUS ракеталари каби, паст баландликларда душман ҳудудига чуқур кириб бориш ва қўмондонлик марказлари, бункерлар ва радарлар каби муҳим нишонларни йўқ қилишга қодир.

Шу билан бирга, Tomahawks кемалар ва сув ости кемаларидан, TAURUS эса самолётлардан чиқарилади.