АҚШга Гренландия устидан назорат керак – Трамп

АҚШга мудофаа мақсадларида Гренландия устидан назорат жуда ҳам зарур. Бу ҳақда АҚШ Президенти Дональд Трамп “The Atlantic” журналига берган интервьюсида маълум қилди.

Интервью давомида Трамп Венесуэлада мамлакат Президенти Николас Мадурони ағдаришдан кейин ҳокимият алмашинуви бўлиши мумкинлигини ҳам инкор этмаган.

“Биласизми, тикланиш ёки режим алмашинуви, буни қандай аташингиздан қатъи назар, ҳозирги ҳолатдан яхшироқ бўлади. Бундан баттар бўлиши мумкин эмас”, деган Оқ уй етакчиси. 

Шунингдек, Трамп АҚШ учун Ғарбий яримшар устидан назорат зарур, деб ҳисоблашини айтиб, 1823 йилда эълон қилинган “Донро доктринаси”ни тилга олган. Бироқ, у Венесуэла Президенти Николас Мадурони олиб қочиш қарори фақат географик омиллар билан боғлиқ эмаслигини билдирган. 

“Гап яримшарда эмас. Гап мамлакатда. Гап алоҳида давлатларда”, дейди АҚШ Президенти. 

Трамп, шунингдек, АҚШ Давлат котиби Марко Рубионинг “АҚШ Президенти айтаётган гапини жиддий назарда тутади” деган баёнотига ҳам изоҳ берди. Трампнинг сўзларига кўра, АҚШ ҳарбийларининг Венесуэладаги ҳаракатлари Гренландияга қандай алоқадор эканини бошқалар баҳолаши керак.

“Буни улар ўзлари баҳолашлари керак бўлади. Мен ростини айтсам, билмайман. Кеча Марко менга нисбатан жуда очиқкўнгил бўлди. Биласизми, ўшанда мен Гренландияни назарда тутмаган эдим. Аммо, бизга Гренландия мутлақо зарур. У бизга мудофаа учун керак”, дейди Трамп. 

Дональд Трамп Гренландия устидан АҚШ назорати зарурлиги ҳақида биринчи марта гапираётгани йўқ. 2025 йилнинг декабрь ойи охирида у BBC’га берган интервьюсида ҳам Қўшма Штатларга Гренландия “миллий хавфсизлик учун зарур” эканини айтган эди. 

Эслатиб ўтамиз, аввалроқ Дания Ташқи ишлар вазири Ларс Лекке Расмуссен Дональд Трампни Гренландияга “қўл теккизмасликка” чақирганди. Унинг таъкидлашича, АҚШ томонидан оролга қилинган ҳар қандай ҳужум бутун Дания қироллигига қилинган ҳужум сифатида қабул қилинади.