АҚШдаги ёнғинлар пайтида Олимпия чемпионининг барча совринлари ўғирлаб кетилди

Америкалик теннисчи, жуфтлик баҳсларида Олимпия чемпиони бўлган Пэм Шрайвер Лос-Анжелесда давом этаётган йирик ўрмон ёнғинларида барча совринларидан айрилди. Бу ҳақда ESPN хабар берди.

Унда ёзилишича, спортчи ёнғинлардан узоқроқ бўлиш мақсадида вақтинча меҳмонхонага кўчиб ўтишга қарор қилган. Кўчиш жараёнида у ўзининг машинасига ютиб олган совринларини жойлаган, жумладан, АҚШ Очиқ чемпионатидаги бешта ғалаба мукофоти, “Roland Garros” мусобақасидаги бешта кубок ва Australian Open чемпионатидаги битта совринни. Аммо 16 январь куни унинг машинаси ўғирлаб кетилган.

“Энди менинг оилам ҳам жиноятчиликдан азият чекди. Одамлар қийин синовларни бошдан кечираётган энг оғир дамларда бундай ҳаракатлар қилаётганларнинг борлиги жуда ачинарли”, деди Шрайвер.

У ҳуқуқ-тартибот идораларига мурожаат қилганини ва адолат тикланишига умид қилаётганини қўшимча қилган.

Маълумот учун, Шрайвер теннис бўйича катта муваффақиятларга эришган. 1988 йилги ёзги Олимпия ўйинларида жуфтлик баҳсларида Зина Гаррисон билан бирга олтин медални қўлга киритган. 1991 йилда у Панамерика ўйинларида учта олтин медаль ютиб олган – яккалик, жуфтлик ва аралаш жуфтлик баҳсларида. Спортчи 1994 йилда профессионал фаолиятини якунлаган.

Жорий йилнинг 7 январь куни бошланган ўрмон ёнғинлари Тинч океани бўйидаги Пасифик-Палисейдс ҳудудини қамраб олди ва кейинчалик Лос-Анжелеснинг бошқа қисмларига тарқалди. Кучли шамол ва ёнғин гидрантларидаги сув танқислиги вазиятни янада оғирлаштириб, оловни ўчириш ишларига тўсқинлик қилмоқда. Бугунги кунгача 27 киши ёнғин қурбони бўлди, минглаб одамлар уйидан айрилди.

Эслатиб ўтамиз, аввалроқ cузиш бўйича 5 карра Олимпия ўйинлари ғолиби Гарри Холл-Жуниор Лос-Анжелесдаги табиий офат вақтида ўз уйидан ва медалларидан айрилгани хабар қилинганди.