АҚШда самолёт қуён сабабли ёниб кетди (видео)

Кеча, 16 апрель куни АҚШнинг Денвер шаҳрида United Airlines авиакомпаниясига тегишли Boeing 737 самолётининг двигатели қуён сабаб ёниб кетди. Бу ҳақда ABC News хабар берди.

Маълум қилинишича, ҳодиса самолёт Денвердан Канаданинг Эдмонтон шаҳрига учиб кетаётганида бўлган. Бу вақтда лайнер бортида 153 йўловчи ва 6 экипаж аъзоси бўлган. Самолёт салонидан олинган кадрларда кўринадики, двигатель ёниб кетганидан кейин бортда ваҳима бошланиб кетган.

Лайнер қайтадан Денвер аэропортига қўнишга мажбур бўлган, жабрланганлар йўқ. Йўловчилар бошқа самолётда Эдмонтонга жўнатилган.

Қўшимча қилинишича, ҳодиса тергови билан АҚШ Федерал авиация бошқармаси шуғулланмоқда. Экспертларнинг аниқлик киритишича, ушбу воқеа қуённинг самолёт турбинасига кириб қолиши билан боғлиқ тўртинчи ҳолат саналади.

Қолаверса, авиакомпаниянинг ўзи ҳам ушбу ҳолатга қуён сабабчи бўлганини тасдиқлаган.

“Денвердан Эдмонтон (UA2325) йўналишидаги рейсимиз ҳайвонларнинг эҳтимолий ҳужуми муаммосини ҳал қилиш учун Денверга эсон-омон қайтиб келди”, дейилади компания баёнотида.

Ҳайвон қандай қилиб двигатель ичига тушиб қолганига аниқлик киритилмаган.

Эслатиб ўтамиз, жорий йилнинг 10 апрель куни АҚШда бортида Конгресснинг камида уч нафар аъзоси бўлган American Airlines авиакомпаниясига тегишли самолёт Вашингтондаги Рональд Рейган номидаги аэропортда ушбу компаниянинг бошқа бир самолёти билан тўқнашиб кетганди.