АҚШда иккита самолёт тўқнашиб кетди

АҚШда бортида Конгресснинг камида уч нафар аъзоси бўлган American Airlines авиакомпаниясига тегишли самолёт Вашингтондаги Рональд Рейган номидаги аэропортда ушбу компаниянинг бошқа бир самолёти билан тўқнашди. Бу ҳақда кеча, 10 апрель куни АҚШ Федерал фуқаро авиацияси бошқармасига таяниб, “Reuters” хабар берди.

“Рональд Рейган номидаги Вашингтон Миллий аэропортида камида уч нафар Конгресс аъзоси бўлган самолётга American Airlines’нинг бошқа бир самолёти қанотини уриб, ўтиб кетди”, дейилади хабарда.

Аниқлик киритилишича, тўқнашган самолётлар Bombardier CRJ 900 ва Embraer E175 бўлган. Ҳар икки ҳаво кемаси техник текширув ўтказиш учун захира самолётлар билан алмаштирилган. Содир бўлган ҳодиса аэропорт ишига таъсир кўрсатмаган.

Эслатиб ўтамиз, аввалроқ АҚШнинг Нью-Йорк шаҳрида ичида саёҳатчилар бўлган вертолёт Гудзон дарёсига қулаши оқибатида олти киши, жумладан, уч бола ҳалок бўлгани хабар қилинган эди. Самолёт дарёга қулаганида сувнинг ҳарорати 50 даража совуқ бўлган. Ҳалокатга учраган вертолёт Bell 206 модели бўлган, учувчи бошқарувни йўқотган, самолёт ҳавода парчалана бошлаган, сўнгра дарёга қулаган. Фавқулодда ҳодиса жойида олиб борилган қидирув ишлари тахминан икки соат давом этган.