АҚШда 3 минг ноқонуний мигрант қўлга олинди

АҚШ Иммиграция ва божхона назорати хизмати (ICE) ходимлари Миннеаполисда (Миннесота штати) федерал ҳуқуқни муҳофаза қилиш органларининг ноқонуний муҳожирларга қарши кураш кампанияси доирасида бошланган энг йирик операцияси чоғида 3 минг мигрантни қўлга олди. Бу ҳақда АҚШ Ички хавфсизлик вазирлиги матбуот хизмати хабар берди. 

“Охирги олти ҳафта ичида [операция бошланганидан бери] ходимларимиз 3 минг ноқонуний муҳожирни ҳибсга олди, улар орасида қотиллар, зўравонлар, педофиллар ва бошқа жуда хавфли шахслар бор. Бу жамоат хавфсизлиги учун катта ғалаба”, дейилади хабарда. 

2025 йил декабрь ойида АҚШ Халқаро валюта бюроси Миннеаполисда Metro Surge операцияси бошланганини эълон қилди. Идора уни АҚШда ўтказилган энг йирик тадбир, деб таърифлади. 

АҚШ Президенти Дональд Трамп аввалроқ у ҳокимиятга келишидан олдин мамлакатга ноқонуний равишда 25 миллионга яқин одам кирганини айтган эди. Оқ уй раҳбари бир неча бор иммиграция сиёсатини қатъийлаштириш тарафдори эканини айтган. Инаугурациядан сўнг у АҚШ ва Мексика чегарасида фавқулодда ҳолат режимини жорий этиш тўғрисидаги фармонни имзолади ва ноқонуний муҳожирларни депортация қилиш бўйича Америка тарихидаги энг йирик операцияни ўтказишни таъминлаш ниятида эканини билдирди. 

Эслатиб ўтамиз, жорий йилнинг 16 январь куни АҚШ Иммиграция ва божхона хизмати (ICE) бир вақтнинг ўзида 73 минг нафар мигрантни ҳибсда ушлаб тургани, бу кўрсаткич идора тарихидаги рекорд экани ҳақида хабар берган эдик. 

АҚШ Ички хавфсизлик вазирлиги 2025 йил 29 декабрь куни ўтган йил давомида мамлакатдан 2,5 миллиондан ортиқ ноқонуний мигрант депортация қилингани ҳақида ҳисобот берган ва бу кўрсаткичлар фақат бошланиши эканини қайд этган.