АҚШ Венесуэланинг янги ҳукуматини расман тан олди

Қўшма Штатлар Венесуэла президенти вазифасини бажарувчи Делси Родригес бошчилигидаги янги ҳукуматини расман тан олди. Бу ҳақда кеча, 7 март куни АҚШ Президенти Дональд Трамп Флоридада Лотин Америкаси давлатлари раҳбарлари билан ўтган саммитда маълум қилди.

“Шуни мамнуният билан хабар қиламанки, биз шу ҳафтада Венесуэла ҳукуматини расман тан олдик. Шунингдек, биз олтин бўйича тарихий келишувга эришдик. Бу келишув мамлакатларимизга Венесуэла олтини ва бошқа фойдали қазилмалари сотилишига кўмаклашиш мақсадида ҳамкорлик қилиш имконини беради. Уларда улкан олтин захиралари бор. Уларнинг ери жуда яхши”, дейди Оқ уй раҳбари.

Жорий йил 6 март куни Вашингтон Венесуэланинг олтин қазиб олиш секторига нисбатан санкцияларни юмшатди. АҚШ Молия вазирлиги Америка компанияларига Венесуэла олтинини импорт қилиш, қайта ишлаш ва ундан тайёрланган маҳсулотларни сотишга рухсат берди.

Вашингтон ва Венесуэланинг янги ҳукумати

Жорий йил бошида АҚШ Венесуэлада ҳарбий операция ўтказди. Мамлакат президенти Николас Мадуро 3 январь куни Каракасда Америка махсус кучлари томонидан қўлга олинди ва АҚШга олиб кетилди. Шундан сўнг, президент вазифасини илгари вице-президент лавозимида ишлаган Делси Родригес бажара бошлади. У Вашингтон босими остида сиёсий маҳбусларни қамоқхоналардан озод қилишга киришди. Родригес, шунингдек, фойдали қазилмалар тўғрисидаги қонунларни ўзгартириб, Венесуэланинг нефть секторини хорижий инвестициялар учун очиб берди. 24 февраль куни Трамп АҚШ ўзининг "янги дўсти ва ҳамкори" Венесуэладан тахминан 89 миллион баррель нефть олганини эълон қилди.

27 февраль куни Родригес Трампни ўз мамлакатига қўйилган санкцияларни бекор қилишга ва Венесуэла нефти блокадасини тўхтатишга чақирди. У Мадуро ағдарилганига қарамай, мамлакатларни бир-бирига "дўстона" деб ҳисоблашини таъкидлади. Унинг сўзларига кўра, Каракасдаги ҳукумат Вашингтон билан "ҳамкорликнинг янги кун тартибини очишга" интилмоқда.

АҚШ Давлат департаменти 5 март куни Венесуэланинг муваққат ҳокимияти билан дипломатик муносабатларни тиклаш бўйича келишувга эришилганини эълон қилди. Марко Рубио бошчилигидаги идора Қўшма Штатлар Венесуэла халқига "тинч йўл билан демократик сайланган ҳукуматга ўтиш учун шароит яратувчи босқичма-босқич жараён" доирасида ёрдам беришда давом этишига ваъда берди.